ದಾನಕ್ಕಿಂತ ದೊಡ್ಡದಿಲ್ಲ

ಸಾಮಾನ್ಯವಾಗಿ ಇತ್ತೀಚಿನ ದಿನಗಳಲ್ಲಿ ಒಂದಲ್ಲಾ ಒಂದು ತಾಪತ್ರಯದಿಂದ ಪ್ರತಿಯೊಬ್ಬರು ಬಳಲುತ್ತಾರೆ. ಅಂತಹ ಪರಿಸ್ಥಿತಿಯಲ್ಲಿ ಜಾತಕದ ಕುಂಡಲಿಯನ್ನು ಪರೀಕ್ಷಿಸಿ ಹಾಗೂ ಅದರಲ್ಲಿ ಇರುವ ತೊಂದರೆಗಳನ್ನು ವಿಮರ್ಶೆ ಮಾಡಿ ಸಂಬಂಧ ಪಟ್ಟ ತೊಂದರೆಗಳಿಗೆ ಯಾವ ದಾನ ಮಾಡಿದರೆ ಅದರಿಂದ ಯಾವ ಪರಿಹಾರ ಸಿಗುತ್ತದೆ ಹಾಗೂ ದಾನದಿಂದ ಆಗುವ ಪ್ರಯೋಜನವೇನು ಎಂದು ತಿಳಿಯೋಣ ಬನ್ನಿ. ನವಗ್ರಹದ ವಿಚಾರಕ್ಕೆ ಬಂದಾಗ, ಜಾತಕದಲ್ಲಿ ಯಾವ ಗ್ರಹದಿಂದ ತೊಂದರೆಯಿದೆ ಎಂದು ತಿಳಿದುಕೊಳ್ಳಬೇಕು. ಅದಕ್ಕೆ ಪೂರಕವಾಗಿ ಧಾನ್ಯ ಹಾಗೂ ವಸ್ತ್ರಗಳನ್ನು ದಾನ ಮಾಡುವುದರಿಂದ ಒಳ್ಳೆಯ ಫಲವನ್ನು ನಿರೀಕ್ಷಿಸಬಹುದು.ಜಾತಕದಲ್ಲಿ ಸೂರ್ಯನಿಂದ ತೊಂದರೆ ಇದ್ದಾಗ ಗೋಧಿ ಅಥವಾ ರವೆಯ ಜತೆ ಕೆಂಪು ವಸ್ತ್ರವನ್ನು ದಾನವಾಗಿ ಕೊಡಬೇಕು. ಜಾತಕದಲ್ಲಿ ಚಂದ್ರನಿಂದ ತೊಂದರೆ ಇದ್ದಾಗ ಅಕ್ಕಿ ಹಾಗೂ ಶ್ವೇತವಸ್ತ್ರ ವನ್ನು (ಬಿಳಿ) ದಾನಕೊಡಬೇಕು. ಜಾತಕದಲ್ಲಿ ಮಂಗಳ (ಕುಜ, ಅಂಗಾರಕ)ನ ತೊಂದರೆ ಇದ್ದಾಗ ತೊಗರಿಬೇಳೆ ಅಥವಾ ಕಾಳಿನ ಜೊತೆ ಅರೆಕೆಂಪು ವಸ್ತ್ರವನ್ನು ದಾನ ಮಾಡುವುದು ಉತ್ತಮ. ಜಾತಕದಲ್ಲಿ ಗುರುವಿನಿಂದ ತೊಂದರೆ ಇದ್ದಾಗ ಕಡಲೆಕಾಳು ಹಾಗೂ ಹಳದಿ ಬಣ್ಣದ ವಸ್ತ್ರವನ್ನು ದಾನ ಮಾಡಬೇಕು. ಜಾತಕದಲ್ಲಿ ಶುಕ್ರನಿಂದ ತೊಂದರೆ ಇದ್ದಾಗ ಅವರೆಕಾಳು ಹಾಗೂ ಬಿಳಿ ಹಾಗೂ ಹಸಿರು ಮಿಶ್ರಿತ ಬಣ್ಣದ ವಸ್ತ್ರವನ್ನು ದಾನ ಮಾಡಬೇಕು. ಜಾತಕದಲ್ಲಿ ಶನೈಶ್ಚರನಿಂದ ತೊಂದರೆಯಿದ್ದಾಗ ಉದ್ದಿನಕಾಳು ಅಥವಾ ಬೇಳೆಯ ಜೊತೆ ಧೂಮ್ರ (ಹೊಗೆ) ಬಣ್ಣದ ವಸ್ತ್ರವನ್ನು ದಾನ ಮಾಡಬೇಕು. ಜಾತಕದಲ್ಲಿ ರಾಹುವಿನಿಂದ ತೊಂದರೆ ಇದ್ದಾಗ ಹುರುಳಿಕಾಳು ಹಾಗೂ ಮಿಶ್ರವರ್ಣದ ಬಟ್ಟೆಗಳನ್ನು ದಾನ ಮಾಡಬೇಕು. ಜಾತಕದಲ್ಲಿ ಕೇತುವಿನಿಂದ ತೊಂದರೆ ಇದ್ದಾಗ ಹುರುಳಿಕಾಳು ಹಾಗೂ ಮಿಶ್ರವರ್ಣದ ಬಟ್ಟೆಗಳನ್ನು ದಾನ ಮಾಡಬೇಕು. ಏಳೂವರೆ ವರ್ಷ ಶನಿಕಾಟವಿದ್ದಾಗ ಕರಿ ಎಳ್ಳು, ಎಳ್ಳೆಣ್ಣೆ, ಕಬ್ಬಿಣದ ಬಾಂಡಲೆ, ಬಾಳೇಹಣ್ಣು, ವಿಳ್ಳೇದೆಲೆ, ಅಡಿಕೆ, ದಕ್ಷಿಣೆ, ಕರಿಬಟ್ಟೆ ಸಮೇತ ದಾನಮಾಡಬೇಕು. ಜಲದಾನ ಮಾಡಿದರೆ ಮನುಷ್ಯನಿಗೆ ಆತ್ಮತೃಪ್ತಿ ಸಿಗುತ್ತದೆ. ಅನ್ನದಾನ ಮಾಡಿದರೆ ಯಾವುದೇ ಕಾಲಕ್ಕೂ ದರಿದ್ರ ಇರುವುದಿಲ್ಲ. ಸುಖ, ಶಾಂತಿ, ನೆಮ್ಮದಿ ದೊರಕುತ್ತದೆ. ಎಳ್ಳಿನ ದಾನದಿಂದ ದರಿದ್ರ ಕಳೆದು ಹೋಗುತ್ತದೆ. ಸುವರ್ಣದಾನದಿಂದ ಆಯಸ್ಸು ವೃದ್ಧಿಯಾಗಿ ನೆಮ್ಮದಿ, ಶಾಂತಿ, ಸದ್ಗತಿ ಪ್ರಾಪ್ತಿಯಾಗುತ್ತದೆ. ಬೆಳ್ಳಿ ದಾನ ಮಾಡಿದರೆ ಸದಾ ಶುಕ್ರನ ಕೃಪಾದೃಷ್ಟಿಯನ್ನು ಹೊಂದಬಹುದು. ದೀಪ ದಾನ ಮಾಡಿದರೆ ಕಣ್ಣಿಗೆ ಸಂಬಂಧಿಸಿದ ವ್ಯಾಧಿಯಿಂದ ಪರಿಹಾರವಾಗಿ ದೃಷ್ಠಿಶಕ್ತಿ ಹೆಚ್ಚುತ್ತದೆ. ವಸ್ತ್ರದಾನದಿಂದ ದಾರಿದ್ರ್ಯ ಕಳೆಯುತ್ತದೆ. ಗೋದಾನದಿಂದ ಒಳಿತಾಗುತ್ತದೆ. ಭೂದಾನದಿಂದ ಭೂಮಿಯಿಂದ ಲಾಭ ಪ್ರಾಪ್ತಿಯಾಗುತ್ತದೆ. ಶ್ರೀಗಂಧವನ್ನು ದೇವರಿಗೆ ದಾನ ಮಾಡಿದರೆ ಸದಾ ಉಲ್ಲಾಸ, ಸಂತೋಷ, ಶಾಂತಿ ಲಭಿಸುತ್ತದೆ. ಅರಿಶಿನ ದಾನದಿಂದ ಸುಮಂಗಲಿತ್ವ ಭಾಗ್ಯ. ಕುಂಕುಮ ದಾನದಿಂದ ಹಿತಶತ್ರುಗಳು ಮುಕ್ತರಾಗುತ್ತಾರೆ. ದಾನ ಕೊಡುವಾಗ ಮನಸ್ಸಿನಲ್ಲಿ ಯಾವುದೇ ಕಾರಣಕ್ಕೂ ಈರ್ಷ್ಯೆ‌, ಗರ್ವ ಇರಕೂಡದು. ಭಕ್ತಿ ಪೂರ್ವಕವಾಗಿ, ಸಮರ್ಪಣಾ ಭಾವದಲ್ಲಿ ಮಾಡುವ ದಾನಕ್ಕೆ ಹೆಚ್ಚು ಫಲವಿರುತ್ತದೆ. * ಡಾ. ಎಸ್‌.ಎನ್‌. ಶೈಲೇಶ್‌ sangraha