ಯಾರ ಮೇಲೆ ಅಭಿಚಾರ ಪ್ರಯೋಗ

ಅಭಿಚಾರ, ಕಾಲಾಜಾದು, ಮಾಟ ಇತ್ಯಾದಿ ಅನೇಕ ಹೆಸರುಗಳಿಂದ ಕರೆಯಲ್ಪಡುವ ಕ್ರಿಯೆಯು ವಿಶ್ವದ ವಿಭಿನ್ನ ಸ್ಥಾನಗಳಲ್ಲಿ ಅನೇಕ ರೂಪಗಳಲ್ಲಿ ಪ್ರಚಲಿತದಲ್ಲಿದೆ. ಈ ಕ್ರಿಯೆಯ ಮೂಲಕ ಹಾನಿಕಾರಕ, ನಕಾರಾತ್ಮಕ ಶಕ್ತಿಗಳನ್ನು ಜಾಗೃತಗೊಳಿಸಲಾಗುತ್ತದೆ. ಅನ್ಯರ ಯಶಸ್ಸು, ಉನ್ನತಿ, ಸಮೃದ್ಧಿ, ಸುಖಗಳನ್ನು ಸಕಾರಾತ್ಮಕವಾಗಿ ಸ್ವೀಕರಿಸದ ಜನರು ಈರ್ಷೆ, ಮತ್ಸರ, ದುರಾಶೇ, ನಿರಾಶೆಗಳಿಂದ ಕೂಡಿ ಅನ್ಯರ ಸುಖ ಸಂತೋಷಗಳನ್ನು ಹಾಳು ಮಾಡಲು ಅಭಿಚಾರ ಕ್ರಿಯೆಗಳ ಮೊರೆ ಹೋಗುತ್ತಾರೆ. ಯಾರು ಈ ಅಭಿಚಾರ ಪ್ರಯೋಗಕ್ಕೆ ಒಳಗಾಗುತ್ತಾರೆ ಎನ್ನುವುದನ್ನು ಅವರ ಕುಂಡಲಿಯಲ್ಲಿರುವ ಗ್ರಹಗಳ ವಿಶೇಷ ಸಂಯೋಗದಿಂದ ಗುರುತಿಸಬಹುದಾಗಿದೆ. ಕುಂಡಲಿಯಲ್ಲಿ ಸೂರ್ಯ, ಚಂದ್ರ, ಶನಿ, ಮಂಗಲರು ಕೆಲವು ವಿಶೇಷ ಭಾವಗಳಲ್ಲಿ ರಾಹು- ಕೇತುಗಳಿಂದ ಪೀಡಿತರಾಗುವುದರಿಂದ ವ್ಯಕ್ತಿಯು ಮಾಟದ ಪ್ರಭಾವಕ್ಕೆ ಒಳಗಾಗುತ್ತಾರೆ. ಯಾರ ಕುಂಡಲಿಯಲ್ಲಿ ಲಗ್ನ ಮತ್ತು ಸೂರ್ಯರು ದುರ್ಬಲರಾಗಿರುವರೋ ಅವರು ಅಭಿಚಾರ ಪೀಡಿತರಾಗಿರುತ್ತಾರೆ. ಕುಂಡಲಿಯಲ್ಲಿ ಗ್ರಹಣಯೋಗವಿದ್ದರೆ, ರಾಹು ಅನಿಷ್ಟಕಾರಿ ಸ್ಥಿತಿಯಲ್ಲಿದ್ದರೆ, ಮಂಗಲ-ಶನಿ ಯುತಿ ಇದ್ದರೆ, ಶನಿ ಚಂದ್ರ ಯುತಿ ಇದ್ದರೆ ಅಥವಾ ಶನಿಯ ವಕ್ರದೃಷ್ಟಿಯಿದ್ದರೆ ಜಾತಕನು ಋುಣಾತ್ಮಕ ಶಕ್ತಿಗಳ ಪ್ರಭಾವಕ್ಕೀಡಾಗುತ್ತಾರೆ. ಈ ಸಮಯದಲ್ಲಿ ಷಷ್ಟಮ ಭಾವ ಮತ್ತು ಷಷ್ಟಮಾಧಿಪತಿಗಳ ದಶಾ ನಡೆಯುತ್ತಿದ್ದು, ದಶಾನಾಥನು ಲಗ್ನ, ಸಪ್ತಮ, ದ್ವಾದಶ ಭಾವಗಳಲ್ಲಿದ್ದು, ಕೇತುವು ಲಗ್ನ ಚತುರ್ಥ ಅಥವಾ ದಶಮ ಭಾವದಲ್ಲಿದ್ದು, ಮಂಗಲನು ಲಗ್ನದೊಂದಿಗೆ ಸಂಬಂಧದಲ್ಲಿದ್ದರೆ ಜಾತಕರು ಅಭಿಚಾರದ ಪ್ರಭಾವಕ್ಕೆ ಒಳಗಾಗುತ್ತಾರೆ. ಬುಧ ಗ್ರಹವು ಮಂದಿ ಅಥವಾ ಗುಳಿಕದೊಂದಿಗೆ ಸಂಬಂಧ ಹೊಂದಿದ್ದು, ಮಂಗಲನು ಬಾಧಕ ಸ್ಥಾನದಲ್ಲಿದ್ದು ಪರಸ್ಪರ ದೃಷ್ಟಿ ಸಂಬಂಧದಲ್ಲಿದ್ದರೆ ಅಭಿಚಾರ ಪ್ರಯೋಗಕ್ಕೆ ಬಲಿಯಾಗುತ್ತಾರೆ. ಈ ಪ್ರಕಾರ ಸಂಯೋಗಗಳಿದ್ದರೆ ಅವುಗಳ ಸಂಬಂಧಿತ ದಶಾ ಅಂತರ್ದಶಾಗತದಲ್ಲಿ ಈ ಪ್ರಭಾವಗಳು ಕಂಡು ಬರುತ್ತವೆ. ಅಭಿಚಾರ ಪ್ರಯೋಗಕ್ಕೀಡಾದವರ ಉದ್ಯೋಗ, ಪಾರಿವಾರಿಕ ಜೀವನ, ಧನ-ಸಮೃದ್ಧಿಗಳ ಮೇಲೆ ಕೆಟ್ಟ ಪರಿಣಾಮ ಉಂಟಾಗುತ್ತದೆ. ವಿನಾಕಾರಣ ಭಯ, ಚಿಂತೆ, ಆರೋಗ್ಯ ಸಮಸ್ಯೆ, ಅಶಾಂತಿ ಪೀಡಿಸುತ್ತವೆ. ಪತ್ನಿ- ಮಕ್ಕಳೊಂದಿಗೆ ಭಿನ್ನಾಭಿಪ್ರಾಯ, ಕಲಹ ಉಂಟಾಗುತ್ತದೆ. ವಿಚಿತ್ರವಾದ ವ್ಯವಹಾರ, ಅಶಾಂತಿ, ಬುದ್ಧಿ ಭ್ರಮಣೆ ಉಂಟಾಗುತ್ತವೆ. ವಿಶೇಷ ಪರಿಸ್ಥಿತಿಗಳಲ್ಲಿ ಅಪ್ರಾಕೃತಿಕ ಮೃತ್ಯುವಿಗೀಡಾಗಬಹುದು. ತಜ್ಞ ಜ್ಯೋತಿಷಿಗಳ ಸಲಹೆ ಪಡೆದು ಸೂಕ್ತ ಪರಿಹಾರ ಕ್ರಮ ಕೈಗೊಂಡರೆ ಸಮಸ್ಯೆಗಳಿಂದ ಪಾರಾಗಬಹುದು. ಶ್ರೀಪಾದ ಆರ್‌. ಕುಲಕರ್ಣಿ