'ಸರಕಾರಿ ಕೆಲಸಕ್ಕೂ' ಗ್ರಹಗಳ ನಂಟು

1. ಕರ್ಕಾಟಕ, ಸಿಂಹ, ಧನು ಹಾಗೂ ತುಲಾ ರಾಶಿಗಳು ರಾಜಕೀಯ ರಾಶಿಗಳು. ಈ ರಾಶಿಯು ಯಾವುದಾದರೂ ಒಂದು ಲಗ್ನವಾಗಿದ್ದಾಗ ನವಮ ಅಥವಾ ದಶಮ ಸ್ಥಾನದಲ್ಲಿ ಗುರು ಇದ್ದರೆ ಶನಿಯು ಸ್ವಂತ ಮನೆಯಲ್ಲಿ ಇಲ್ಲವೆ, ಉಚ್ಛ ರಾಶಿಯಲ್ಲಿ ಇದ್ದರೆ ಅಂಥವರು ನ್ಯಾಯಾಲಯದ ನ್ಯಾಯಾಧೀಶರಾಗುತ್ತಾರೆ. 2. ಕರ್ಕಾಟಕ, ಸಿಂಹ, ತುಲಾ, ಧನು ಇಲ್ಲವೆ ಕುಂಭ ರಾಶಿಗಳಲ್ಲಿ ಯಾವುದಾದರೂ ಒಂದು ರಾಶಿಯು ಲಗ್ನವಾಗಿ ದ್ವಿತೀಯ ಅಥನಾ ದಶಮದಲ್ಲಿ ಗುರು ಬಲಿಷ್ಠನಾಗಿದ್ದು ರವಿಯು ಪಂಚಮ ಷಷ್ಠ, ನವಮ ಇಲ್ಲವೆ ದಶಮ ಸ್ಥಾನದಲ್ಲಿ ಇದ್ದರೆ ಶನಿ-ಚಂದ್ರ ಇಲ್ಲವೆ ಶನಿ-ರವಿ ಕೇಂದ್ರ ಯೋಗ ಇದ್ದರೆ ಈ ಯೋಗವು ಸಿಗುವುದಿಲ್ಲ. 3. ರವಿ ಉಚ್ಛನಾಗಿ, ಬಲಿಷ್ಠ ಅಥವಾ ಸ್ವ ಕ್ಷೇತ್ರದಲ್ಲಿ ಇದ್ದರೆ ಅದು ದಶಮ ಏಕಾದಶ ಸ್ಥಾನವಾದರೆ ಮತ್ತು ಸಿಂಹ ಅಥವಾ ಧನು ಲಗ್ನವಾದರೆ ಬಲಿಷ್ಠನಾದ ರವಿಯು ಲಗ್ನದಲ್ಲಾಗಲೀ ಇಲ್ಲವೆ ದಶಮ ಸ್ಥಾನದಲ್ಲಿದ್ದು ಮಂಗಳನು ಉಚ್ಛನಿದ್ದರೆ ಈ ಯೋಗ ಇದ್ದವರು ಜಿಲ್ಲಾಧಿಕಾರಿಯಾಗುತ್ತಾರೆ. ಬಲಿಷ್ಠವಾದ ಮಂಗಳನು ದಶಮದಲ್ಲಿದ್ದರೆ ಮೇಲಿನ ಯೋಗಕ್ಕೆ ಅನುಕೂಲವಾಗುವುದು. 4. ಕುಜ, ರಾಹು ಹಾಗೂ ಶನಿ ಗ್ರಹಗಳು ಅಧಿಕಾರಕ್ಕೆ ಯೋಗಕಾರಕರು. ಲಗ್ನ ಅಥವಾ ದಶಮದಲ್ಲಿ ಈ ಗ್ರಹಗಳ ಮುಖಾಮುಖಿಯಾದರೆ ಬಹಳ ಒಳ್ಳೆಯದು. ಮೇಷ ಲಗ್ನ ಅಥವಾ ದಶಮ ಸ್ಥಾನದಲ್ಲಿ ಶನಿ-ಮಂಗಳ ಯೋಗ ಇದ್ದರೆ ಜಾತಕರು ಪೊಲೀಸ್‌ ಇಲಾಖೆಯಲ್ಲಿ ಅಧಿಕಾರ ಪಡೆಯುತ್ತಾರೆ. 5. ಮೇಷ ಲಗ್ನವಾಗಿ ಅಲ್ಲಿ ರವಿ, ಶುಕ್ರ ಯೋಗ ಇದ್ದರೆ ಬಹಳ ಒಳ್ಳೆಯದು. ದಶಮ ಸ್ಥಾನವಾಗಿ ಮೇಷ, ಕರ್ಕಾಟಕ, ತುಲಾ ಅಥವಾ ಮಕರ ಇವುಗಳಲ್ಲಿ ಯಾವುದಾದರೊಂದು ರಾಶಿಯಾದರೆ ಬಹಳ ಒಳ್ಳೆಯದು. ಜಾತಕನು ಅಗ್ನಿ ತತ್ವದ ರಾಶಿಯಲ್ಲಿ ಜನಿಸಿದರೆ ಅವರಿಗೆ ಬರುವ ಯಾವುದೇ ಎಡರು ತೊಡರುಗಳನ್ನು ಆದಷ್ಟು ಬೇಗ ನಿವಾರಿಸುವರು. 6. ಪೊಲೀಸರ ಜಾತಕದಲ್ಲಿ ತೃತೀಯ ಷಷ್ಠ, ಅಷ್ಟಮ, ದಶಮ ಇಲ್ಲವೆ ಲಗ್ನ ಸ್ಥಾನದಲ್ಲಿ ಯಾವುದಾದರೂ ಒಂದು ಸ್ಥಾನದಲ್ಲಿ ಮಂಗಳ ಇಲ್ಲವೆ ರಾಹು ಇದ್ದೇ ಇರುತ್ತದೆ. 7. ಅಧಿಕಾರದ ಸ್ಥಾನದಲ್ಲಿರುವವರ ಜಾತಕದಲ್ಲಿ ರವಿಯು ಬಲಿಷ್ಠನಾಗಿರುತ್ತಾನೆ. ಬಲಹೀನನಾದ ರವಿ ಇದ್ದರೆ ಅವರೂ ಎಂದೂ ಅಧಿಕಾರ ಸ್ಥಾನದಲ್ಲಿರುವುದಿಲ್ಲ. 8. ಲೋಕೋಪಯೋಗಿ ಇಲಾಖೆಯಲ್ಲಿರುವ ನೌಕರರ ಜಾತಕದಲ್ಲಿ ಶನಿಯು ಬಲಿಷ್ಠನಾಗಿರುತ್ತಾನೆ. ಮಿಥುನ, ಕನ್ಯಾ, ತುಲಾ, ಮಕರ ಇಲ್ಲವೆ ಕುಂಭ ರಾಶಿಯಲ್ಲಿ ಯಾವುದಾದರೂ ಒಂದು ರಾಶಿಯಲ್ಲಿ ಶನಿಯು ಇದ್ದೇ ಇರಬೇಕು. 9. ಲೋಕೋಪಯೋಗಿ ಇಲಾಖೆಯ ಅಧಿಕಾರಿಗಳಲ್ಲಿ ರವಿ, ಬುಧ, ಶನಿ ಗ್ರಹಗಳು ಬಲಿಷ್ಠನಾಗಿರಬೇಕು. ಪಿ. ಹರಿಶ್ಚಂದ್ರ ಸಾಲಿಯಾನ್‌