ಧಾನ್ಯ ಫಲ: ಉತ್ತಮ ಆರೋಗ್ಯಕ್ಕೆ ನವಧಾನ್ಯ ಧಾನ

ನವಗ್ರಹಗಳಿಗೆ ಪೂರಕವಾದ ನವಧಾನ್ಯಗಳಿವೆ. ಹೀಗೆ ಗುರುತಿಸಲ್ಪಟ್ಟ ಒಂದೊಂದು ಧಾನ್ಯವೂ ಆಯಾ ಗ್ರಹಗಳ ಗುಣ, ಸ್ವಭಾವಕ್ಕೆ ಪೂರಕವಾದಂತಿದೆ. ಹಾಗೆಂದೇ ಉಷ್ಣಂ ಉಷ್ಣೇನ ಶೀತಲಂ ಎನ್ನುವಂತೆ ಬಿಸಿಯಿಂದ ಉಂಟಾದ ದೋಷವನ್ನು ಬಿಸಿಯಾದ ಪದಾರ್ಥದಿಂದಲೇ ಕಳೆದುಕೊಳ್ಳಬಹುದು. ನವಧಾನ್ಯಗಳ ವಿಶೇಷತೆಯೊಂದಿಗೆ ಅದರಿಂದ ಉಂಟಾಗುವ ಆರೋಗ್ಯಭಾಗ್ಯವನ್ನು ಗಮನಿಸೋಣ. ಗೋಧಿ : ಸೂರ್ಯ ಗ್ರಹದ ಸಂಕೇತ. ಗೋಧಿಯನ್ನು ಬಳಸುವುದರಿಂದ ಪಿತ್ತ ಹಾಗೂ ಪಿತ್ತ ಪ್ರದಾನವಾದ ದೋಷಗಳು ನಿವಾರಣೆಯಾಗುತ್ತವೆ. ಸನ್‌ಸ್ಟ್ರೋಕ್‌ನಂತಹ ದುಷ್ಪರಿಣಾಮಗಳನ್ನು ತಡೆಗಟ್ಟುವ ಪ್ರತಿರೋಧಕ ಶಕ್ತಿಯನ್ನು ಹೆಚ್ಚಿಸುತ್ತದೆ. ಸೂರ್ಯದೋಷ ಉಳ್ಳವರು ಪ್ರತಿ ಭಾನುವಾರ ನವಗ್ರಹಗಳಿಗೆ ಎರಡು ಪ್ರದಕ್ಷಿಣೆ ಬಂದು ಗೋಧಿಯನ್ನು ದಾನ ಮಾಡುವುದು ಒಳ್ಳೆಯದು. ಅಕ್ಕಿ : ತಂಡುಲ ಎಂತಲೂ ಹೆಸರು ಚಂದ್ರನನ್ನು ಪ್ರತಿನಿಧಿಸುತ್ತದೆ. ಚಂದ್ರನು ಮನಸ್ಸಿನ ಕಾರಕ. ಆ ಕಾರಣ ಮಾನಸಿಕವಾಗಿ ಬಲಾಢ್ಯನಾಗಲು, ಮನೋ ಏಕಾಗ್ರತೆಗೆ, ಮನಃಶಾಂತಿಗಾಗಿ, ರಕ್ತ ಚಲನೆ ಸರಾಗವಾಗಿ ಆಗಲು ಸಣ್ಣ ಮಕ್ಕಳಲ್ಲಿ ಕಾಣುವ ಎಲ್ಲಾ ಬಗೆಯ ವ್ಯಾಧಿಗಳ ನಿವಾರಣೆಗೆ ಅಕ್ಕಿಯು ಸಂಜೀವಿನಿಯಂತೆ ಕೆಲಸ ಮಾಡುತ್ತದೆ. ಚಂದ್ರ ದೋಷ ಇರುವವರು ಪ್ರತಿ ಸೋಮವಾರ ನವಗ್ರಹಗಳಿಗೆ ಒಂಬತ್ತು ಪ್ರದಕ್ಷಿಣೆ ಹಾಕಿ ಅಕ್ಕಿಯನ್ನು ದಾನ ಮಾಡುವುದು. ತೊಗರಿ : ಅಂಗಾರಕನನ್ನು ಪ್ರತಿನಿಧಿಸುತ್ತದೆ. ತೊಗರಿ ಬೇಳೆಯ ಬಳಕೆಯಿಂದ ಸ್ತ್ರೀ ಸಂಬಂಧಿತ ರೋಗಗಳು ನಿವಾರಣೆಯಾಗುತ್ತವೆ. ಯಥೇಚ್ಛವಾಗಿ ತೊಗರಿಯನ್ನು ಬಳಸುವುದರಿಂದ ಹೃದಯದ ಕವಾಟಗಳಲ್ಲಿರುವ ತೊಂದರೆ, ನ್ಯೂನತೆ ಕಳೆಯುತ್ತದೆ. ರೋಗ ನಿರೋಧಕವಾಗೂ ಕೆಲಸ ಮಾಡುತ್ತದೆ. ಅಂಗಾರಕ ಅಥವಾ ಕುಜ ದೋಷ ಉಳ್ಳವರು ಪ್ರತಿ ಮಂಗಳವಾರ ನವಗ್ರಹಗಳಿಗೆ ಒಂಬತ್ತು ಪ್ರದಕ್ಷಿಣೆ ಹಾಕಿ ತೊಗರಿಬೇಳೆಯನ್ನು ದಾನ ಮಾಡಬೇಕು. ಹೆಸರು ಕಾಳು : ಬುಧಗ್ರಹವನ್ನು ಪ್ರತಿನಿಧಿಸುತ್ತದೆ. ಹೆಸರು ಕಾಳಿನ ಬಳಕೆಯಿಂದ ಮಾತು ಸ್ಪಷ್ಟವಾಗುತ್ತದೆ. ನರನಾಡಿಗಳು ಬಲಗೊಳ್ಳುತ್ತವೆ. ನೆನಪಿನ ಶಕ್ತಿ ಹೆಚ್ಚುತ್ತದೆ. ಚಿತ್ತಭ್ರಮೆ ದೂರಾಗುತ್ತದೆ, ಮೈತುರಿಸುವಿಕೆ ಮರೆಯಾಗುತ್ತದೆ. ಬುಧ ದೋಷವುಳ್ಳವರು ಪ್ರತಿ ಬುಧವಾರ ನವಗ್ರಹಗಳಿಗೆ ನಾಲ್ಕು ಪ್ರದಕ್ಷಿಣೆ ಬಂದು ಹೆಸರುಕಾಳನ್ನು ದಾನ ಮಾಡುವುದು. ಕಡಲೆ : ಗುರು ಗ್ರಹವನ್ನು ಪ್ರತಿನಿಧಿಸುತ್ತದೆ. ಆಹಾರದಲ್ಲಿ ಕಡಲೆಕಾಳನ್ನು ಬಳಸುವುದರಿಂದ ಮಧುಮೇಹ, ಜಠರಾಗ್ನಿ ದೋಷ ನಿವಾರಣೆಯಾಗುತ್ತದೆ. ಮೇದೋಜೀರಕ ಗ್ರಂಥಿ ಜಾಗೃತಗೊಳ್ಳುತ್ತದೆ. ರಕ್ತನಾಳಗಳು ಶುದ್ಧವಾಗುತ್ತವೆ. ಗುರು ದೋಷ ಇರುವವರು ಪ್ರತಿ ಗುರುವಾರ ನವಗ್ರಹಗಳಿಗೆ ಐದು ಪ್ರದಕ್ಷಿಣೆ ಹಾಕಿ ಕಡಲೆಕಾಳನ್ನು ದಾನವಾಗಿ ಕೊಡಬೇಕು. ಅವರೆ : ಶುಕ್ರಗ್ರಹವನ್ನು ಪ್ರತಿನಿಧಿಸುತ್ತದೆ. ಅವರೆಕಾಳಿನ ಬಳಕೆಯಿಂದ ಗುಪ್ತವ್ಯಾಧಿಗಳು ದೂರಾಗುತ್ತವೆ. ಮೂತ್ರವ್ಯಾಧಿ ನಿವಾರಣೆಯಾಗುತ್ತವೆ. ಮೇಧಾಶಕ್ತಿ ಹೆಚ್ಚುತ್ತದೆ. ಥೈರಾಯ್ಡ್‌ ನಿಂದ ಬಳಲುತ್ತಿರುವವರಿಗೆ ಸಂಜೀವಿನಿಯಾಗಿ ಕೆಲಸ ಮಾಡುತ್ತದೆ. ಶುಕ್ರದೋಷ ಉಳ್ಳವರು ಪ್ರತಿ ಶುಕ್ರವಾರ ನವಗ್ರಹಗಳಿಗೆ ಆರು ಪ್ರದಕ್ಷಿಣೆ ಬಂದು ಅವರೆಕಾಳನ್ನು ದಾನ ಮಾಡುವುದು. ಕಪ್ಪು ಎಳ್ಳು : ಕಪ್ಪು ಎಳ್ಳು ಶನಿಗ್ರಹದ ಸಂಕೇತ. ಮಂದ ಸ್ವಭಾವ ಉಳ್ಳದ್ದು. ಸಂಧಿವಾತ, ಪಾಶ್ರ್ವವಾಯು, ಕರುಳವ್ಯಾಧಿಯಿಂದ ಬಳಲುತ್ತಿರುವವರಿಗೆ ಕರಿ ಎಳ್ಳು ಸಂಜೀವಿನಿಯಂತೆ ಕೆಲಸ ಮಾಡುತ್ತದೆ. ಒಣಕೆಮ್ಮು ಸಹ ನಿವಾರಣೆಯಾಗುತ್ತದೆ. ಶನಿ ಸಂಬಂಧಿತ ದೋಷದಿಂದ ಬಳಲುತ್ತಿರುವವರು ಪ್ರತಿ ಶನಿವಾರ ನವಗ್ರಹಗಳಿಗೆ ಏಳು ಬಾರಿ ಪ್ರದಕ್ಷಿಣೆ ಬಂದು ನಂತರ ಕರಿ ಎಳ್ಳನ್ನು ದಾನ ಮಾಡುವುದು ಒಳ್ಳೆಯದು. ಉದ್ದು: ರಾಹು ಗ್ರಹದ ಸಂಕೇತ. ಆಹಾರದಲ್ಲಿ ಉದ್ದನ್ನು ಬಳಸುವುದರಿಂದ ಭಯ, ಉದ್ವಿಗ್ನತೆ, ಕ್ರೂರ ಜಂತುಗಳಿಂದ ಬಾಧೆ, ಸರ್ಪಸುತ್ತು, ಚರ್ಮ ಸಂಬಂಧಿ ತೊಂದರೆಗಳು ನಿವಾರಣೆಯಾಗುತ್ತವೆ. ರಾಹು ದೋಷ ಉಳ್ಳವರು ಪ್ರತಿ ಶನಿವಾರ ನವಗ್ರಹಗಳಿಗೆ ಒಂಬತ್ತು ಪ್ರದಕ್ಷಿಣೆ ಬಂದು ಉದ್ದನ್ನು ದಾನ ಮಾಡಬೇಕು. ಹುರುಳಿ: ಕೇತು ಗ್ರಹದ ಸಂಕೇತ. ಆಹಾರದಲ್ಲಿ ಹುರುಳಿಯನ್ನು ಬಳಸುವುದರಿಂದ ಕ್ಯಾನ್ಸರ್‌ನಂತ ಮಾರಣಾಂತಿಕ ರೋಗಗಳಿಗೆ ತೀವ್ರ ಪ್ರತಿರೋಧ ಒಡ್ಡಬಹುದು. ಗ್ರಂಥಿ ದೋಷ, ಜೀವಾಣುಗಳಿಂದ ಬರುವ ವ್ಯಾಧಿಯನ್ನು ತಡೆಗಟ್ಟಬಹುದು. ಕೇತು ದೋಷವುಳ್ಳವರು ಪ್ರತಿ ಮಂಗಳವಾರ ನವಗ್ರಹಗಳಿಗೆ ಒಂಬತ್ತು ಪ್ರದಕ್ಷಿಣೆ ಬಂದು ಹುರುಳಿಕಾಳನ್ನು ದಾನವಾಗಿ ಕೊಡಬೇಕು. sangraha