ಹಿರಿಯರಿಗೆ ಗೌರವ ದೋಷಗಳು ದೂರ

ಸೂರ್ಯ, ಚಂದ್ರರೇ ಜಾತಕ ಕಣ್ಣುಗಳು. ಕುಟುಂಬ ಸೌಖ್ಯಕ್ಕೆ ಅವರೇ ಆಧಾರ. ಜ್ಯೋತಿಷ್ಯದ ಪ್ರಕಾರ ಸೂರ್ಯನೇ ತಂದೆ, ಚಂದ್ರನೇ ತಾಯಿ. ಮನೆಯೊಳಗಿನ ತಂದೆ, ತಾಯಂದಿರನ್ನು ಚೆನ್ನಾಗಿ ನೋಡಿಕೊಂಡರೆ ಸಾಕು ಕಷ್ಟಗಳಿಗಿನ್ನು ಗುಡ್‌ಬೈ ಏನಂತೀರಾ? ಜ್ಯೋತಿಷ್ಯಶಾಸ್ತ್ರದ ಪ್ರಕಾರ ಸೂರ್ಯ, ಚಂದ್ರ ಎರಡು ಕಣ್ಣುಗಳಿದ್ದಂತೆ. ಒಂದನ್ನು ಬಿಟ್ಟು ಒಂದು ಇರಲ್ಲ. ಜ್ಯೋತಿಷ್ಯ ಸೂರ್ಯನನ್ನು ಆರೋಗ್ಯಕ್ಕೂ, ಚಂದ್ರನನ್ನು ಮನಸ್ಸಿಗೂ ಹೋಲಿಸುತ್ತದೆ. ನೋಡಿದ್ರಾ ಎಂಥಾ ಕಾಂಬಿನೇಷನ್‌. ಮನಸ್ಸು ಸರಿ ಇಲ್ಲದಿದ್ದರೆ ಆರೋಗ್ಯ ಇಲ್ಲ. ಆರೋಗ್ಯ ಸರಿ ಇಲ್ದೆ ಇದ್ರೆ ಮನಸು ಸರಿ ಇರಲ್ಲ. ಅದೇ ಸೂರ್ಯ, ಚಂದ್ರನನ್ನು ತಂದೆ, ತಾಯಿಗೂ ಜ್ಯೋತಿಷ್ಯ ಹೋಲಿಸುತ್ತದೆ. ಜಾತಕನ ಕುಂಡಲಿಯಲ್ಲಿ ಹನ್ನೆರಡು ಮನೆಗಳು. ಒಂದೊಂದು ಮನೆಯೂ ಒಂದೊಂದು ರಾಶಿಯ ಸಂಕೇತ. ಸಿಂಹ ಸೂರ್ಯನ ಮನೆಯಾದರೆæ, ಕಟಕ ಚಂದ್ರನ ಮನೆ. ಇನ್ನು ಮಕರ ಲಗ್ನದ ಅಧಿಪತಿ ಶನಿ. ಜ್ಯೋತಿಷ್ಯದ ಲೆಕ್ಕಾಚಾರ ರೀತ್ಯ ಕುಂಭ ಹಾಗೂ ಮಕರಕ್ಕೆ ಪರಮ ವೈರತ್ವ. ಸೂರ್ಯನನ್ನೇ ಸಂತಾನಾಧಿಪತಿ ಎನ್ನುತ್ತಾರೆ. ಮೇಷ ರಾಶಿಯಲ್ಲಿ ಸಂಚರಿಸುವಾಗ ಮಕ್ಕಳೊಂದಿಗೆ ಉತ್ತಮ ಬಾಂಧವ್ಯವನ್ನು ಜಾತಕ ಹೊಂದಿರುತ್ತಾನೆ. ಚಂದ್ರನದು ಶೀತಲ ಗುಣ. ಹಾಗೆಂದೇ ಅವನದು ಜಲತತ್ವ. ಜಲತತ್ವವನ್ನು ಮಾತೃತ್ವ ಸ್ಥಾನ ಎನ್ನುತ್ತಾರೆ. ಮಾತೃ ಭಾವವೇ ಚಂದ್ರ. ಚಂದ್ರನಿಗೂ ಶನಿಗೂ ವೈರತ್ವ. ಚಂದ್ರನ ಸ್ಥಾನದಲ್ಲಿ ಶನಿಯು ಸಂಚರಿಸುವಾಗ ತಂದೆ ತಾಯಂದಿರಿಗೆ ಮಕ್ಕಳಿಂದ ಸುಖವಿರುವುದಿಲ್ಲ. ಜ್ಯೋತಿಷ್ಯ ಶಾಸ್ತ್ರದಲ್ಲಿ ಸೂರ್ಯ, ಚಂದ್ರರು ದುಷ್ಟ ಸ್ಥಾನದಲ್ಲಿ (6, 8, 12) ಕುಳಿತಾಗ ತಂದೆ, ತಾಯಿಯರಿಗೆ ಕಷ್ಟ ತಪ್ಪಿದ್ದಲ್ಲ. ಯಾವುದೇ ಲಗ್ನಕ್ಕೆ ಪಂಚಮವೇ ಸಂತಾನ ಸ್ಥಾನ. ದುಸ್ಥಾನಗಳಲ್ಲದೆ ಅಧಿಪತಿಯು ಬೇರೆ ಸ್ಥಾನಗಳಲ್ಲಿದ್ದರೆ ಕುಟುಂಬ ಸೌಖ್ಯ ನಿರೀಕ್ಷಿಸಬಹುದು. ತಾಯಿ, ತಂದೆ ಕಣ್ಣಿಗೆ ಕಾಣೋ ದೇವರು ಎನ್ನೋ ಹಾಡಿನ ಸಾಲುಗಳಂತೆ ಅಗ್ನಿತತ್ವ ಕಾರಕನಾದ ಸೂರ್ಯನೇ ತಂದೆ. ಜಲತತ್ವ ಕಾರಕನಾದ ಚಂದ್ರನೇ ತಾಯಿ. ಅವರೀರ್ವರು ನಿಮ್ಮ ಬದುಕಿಗೆ ಕಣ್ಣುಗಳಿದ್ದಂತೆ. ತಂದೆ, ತಾಯಿಯಂದಿರನ್ನು ಸರಿಯಾಗಿ ನೋಡಿಕೊಂಡರೆ ಸಾಕು ಯಾವುದೇ ದೋಷದ ಭಯವಿಲ್ಲ. ಜಾತಕದಲ್ಲಿ ಯಾವುದೇ ಕಷ್ಟ ಗಳಿದ್ದರೂ, ದುಷ್ಟಗ್ರಹಗಳ ಪ್ರಭಾವವಿದ್ದರೂ ಒಳ್ಳೆಯ ಭಾವನೆ ಪರಿವರ್ತನೆ ತರುತ್ತದೆ. ಮನೆಯೊಳಗೆ ಸಕಾರಾತ್ಮಕ ಪರಿಣಾಮವನ್ನು ಉಂಟು ಮಾಡುತ್ತದೆ. * ಪ್ರೊ. ಎನ್‌.ಎಸ್‌.ಮೂರ್ತಿ