ಉತ್ತಮ ಅಭ್ಯಾಸ ನವಗ್ರಹಗಳ ಅಭಯ

ಗುರುಚರಿತ್ರೆಯಲ್ಲಿ ಒಬ್ಬ ವ್ಯಕ್ತಿ ಹೇಗಿರಬೇಕು, ದೈನಂದಿನ ಜೀವನದಲ್ಲಿ ಅವನ ಅಭ್ಯಾಸ ಕ್ರಮ ಹೇಗಿರಬೇಕು ಎನ್ನುವುದನ್ನು ತಿಳಿಸುತ್ತದೆ. ಇಲ್ಲವಾದರೆ ಇನ್ನಿಲ್ಲದ ಕರ್ಮಪಾಕಕ್ಕೆ ಗುರಿಯಾಗಬೇಕಾಗುತ್ತದೆ ಎಂದೂ ಎಚ್ಚರಿಸುತ್ತದೆ. ಕರ್ಮಪಾಕಗಳು ನವಗ್ರಹಗಳ ಪ್ರಭಾವಕ್ಕೂ ಸಂಬಂಧವಿದೆ ಎನ್ನುವುದಿಲ್ಲಿ ಗಮನಾರ್ಹ. 'ನಮ್ಮ ಒಂಭತ್ತು ಅಭ್ಯಾಸಗಳು, ನವಗ್ರಹಗಳ ಮೇಲೆ ಪರಿಣಾಮ ಬೀರಿ, ಅದರಿಂದ ನಮ್ಮ ಜೀವನ ಮತ್ತು ನಮ್ಮ ಮನೆಯ ಮೇಲೆ ಪರಿಣಾಮ ಬೀರುತ್ತದೆ' ಎಂಬ ಮೆಸೇಜೊಂದು ನನ್ನ ಬಾಲ್ಯವನ್ನು ನೆನಪಿಸಿತು. ಅಪ್ಪ ಅಮ್ಮ ಹೇಳುತ್ತಿದ್ದ-'ಕಾಲು ಸರಿಯಾಗಿ ತೊಳೆಯದಿದ್ದರೆ ಶನಿಮಹರಾಯ ಬೆನ್ನು ಹತ್ತುತ್ತಾನೆ. ಹಾಸಿಗೆ ಸುತ್ತಿಟ್ಟು, ಶನಿಗಸ ಗುಡಿಸದಿದ್ದರೆ ಮನೆಗೆ ಒಳ್ಳೆಯದಲ್ಲ. ಎಲ್ಲೆಲ್ಲೋ ಉಗುಳಬಾರದು, ಬಚ್ಚಲಿನಲ್ಲಿ ಮಾತ್ರ ಉಗುಳಬೇಕು. ಕಸ ಎಲ್ಲೊಲ್ಲೋ ಚೆಲ್ಲಬಾರದು, ಆರು ಕಾಳು ತಂದರೆ ಮೂರು ಕಾಳು ಚೆಲ್ಲಬಾರದು' ಎಂಬ ನುಡಿಗಳ ಹಿಂದೆ ಎಷ್ಟೊಂದು ವಿಚಾರಗಳಿವೆ. ಒಳ್ಳೆಯ ಅಭ್ಯಾಸಗಳು ಎಂದೆಂದಿಗೂ ಪ್ರಸ್ತುತ. ಅಭ್ಯಾಸಗಳಿಂದ ನವಗ್ರಹಗಳ ಪ್ರಭಾವ ನಮ್ಮ ಮೇಲಾಗುತ್ತದೆಂದರೆ ನಂಬಿಕೆ ಬರುತ್ತಿಲ್ಲವೇ? ಬೆಟ್ಟದ ನೆಲ್ಲಿಕಾಯಿ, ಸಮುದ್ರದೊಳಗಿನ ಉಪ್ಪಿಗೂ ಎತ್ತಣಿಂದೆತ್ತ ಸಂಬಂಧ? ಹಾಂ ಸಂಬಂಧವಿದೆ. ನಮ್ಮ ಅಭ್ಯಾಸಗಳಿಗೂ ನವಗ್ರಹಗಳಿಗೂ! ಅದರ ಫಲಗಳಿಗೂ!! 1. ನಿಮಗೆ ಎಲ್ಲೆಂದರಲ್ಲಿ ಉಗುಳುವ ಅಭ್ಯಾಸವಿದ್ದರೆ ತಕ್ಷ ಣ ಅದನ್ನು ನಿಲ್ಲಿಸಿ. ಎಲ್ಲೆಂದರಲ್ಲಿ ಉಗುಳುವ ಬದಲು ಸರಿಯಾದ ಅಭ್ಯಾಸ ಮಾಡಿಕೊಳ್ಳಿ. ಇದರಿಂದ ನಿಮ್ಮ ಘನತೆಗೆ ಕುಂದು ಬರುವುದಾದರೂ ತಪ್ಪುತ್ತದೆ. 2. ನೀವು ತಿಂದ ತಟ್ಟೆಗಳನ್ನು ನೀವೇ ತೊಳೆಯಿರಿ. ನಿಮ್ಮ ಎಂಜಲು ತಟ್ಟೆಗಳನ್ನು ಮತ್ತೊಬ್ಬರು ತೊಳೆಯಲಿಕ್ಕೆ ಅವಕಾಶ ಮಾಡಿಕೊಟ್ಟರೆ ನಿಮಗೆ ಕರ್ಮ ತಟ್ಟುವುದು ತಪ್ಪಿಲ್ಲ. ನಿಮ್ಮ ಕೆಲಸ ನೀವೇ ಮಾಡುವುದರಿಂದ ಚಂದ್ರ ಮತ್ತು ಶನಿ ಗ್ರಹಗಳನ್ನು ಗೌರವಿಸಿದಂತಾಗುತ್ತದೆ. ಮನಸ್ಸಿಗೂ ಶಾಂತಿ ದೊರೆಯುತ್ತದೆ. 3. ಅತಿಥಿ-ಅಭ್ಯಾಗತರು ಮನೆಗೆ ಬಂದ ಕೂಡಲೇ ನೀರನ್ನು ಕೊಟ್ಟು ಉಪಚರಿಸಿ. ಬಂದ ಅತಿಥಿಗಳ ದಾಹ ಕಡಿಮೆಯಾಗುತ್ತದೆ ಅಷ್ಟೇ ಅಲ್ಲ, ರಾಹು ಗ್ರಹವೂ ಪ್ರಸನ್ನವಾಗುತ್ತದೆ. 4. ನಮ್ಮ ಮನೆಯ ಅಂಗಳದಲ್ಲಿರುವ ಗಿಡಗಳು ಸಹ ಕುಟುಂಬದ ಸದಸ್ಯರಿದ್ದಂತೆ. ಅವುಗಳಿಗೆ ನಮ್ಮ ಪ್ರೀತಿ ಮತ್ತು ಆರೈಕೆಯ ಅಗತ್ಯವಿದೆ. ಪ್ರತಿನಿತ್ಯ ಅವುಗಳಿಗೆ ನೀರುಣಿಸುವ ಮೂಲಕ ಗುರು, ಚಂದ್ರ ಮತ್ತು ಸೂರ್ಯ ಗ್ರಹಗಳ ಅನುಗ್ರಹವನ್ನು ಸಂಪಾದಿಸಬಹುದು. ಮರ ಗಿಡಗಳ ವಾತಾವರಣದಲ್ಲಿ ಓಡಾಡುವುದರಿಂದ ಮನಸ್ಸು ತೃಪ್ತಗೊಳ್ಳುವುದು. 5. ಮನೆಯ ಹೊರಗೆ ಪಾದರಕ್ಷೆಗಳನ್ನು ವ್ಯವಸ್ಥಿತವಾಗಿ ಬಿಡಿ. ಮನೆಯೊಳಗೆ ಯಾವುದೇ ಕಾರಣಕ್ಕೂ ಚಪ್ಪಲಿ, ಶೂಗಳನ್ನು ಹಾಕಿಕೊಂಡು ಬರಬೇಡಿ. ಸ್ವಚ್ಛವಾಗಿರುವ ಮನೆಯೊಳಗೆ ಶನಿ ಪ್ರವೇಶಿಸುವುದಿಲ್ಲ. ಅವನ ಕುದೃಷ್ಟಿಯೂ ಬೀರುವುದಿಲ್ಲ. 6. ಹಾಸಿಗೆಯಿಂದ ಮೇಲೆದ್ದ ಕೂಡಲೇ ಬೆಡ್‌ಶೀಟ್‌ಗಳನ್ನು ಮಡಚಿಡಿ. ಕಸವನ್ನು ಚೆನ್ನಾಗಿ ಹೊಡೆದು ಮನೆಯನ್ನು ಸ್ವಚ್ಛವಾಗಿಟ್ಟುಕೊಳ್ಳಿ. ಇಲ್ಲವಾದರೆ ಅಸ್ತವ್ಯಸ್ತವಾದ ಹಾಸಿಗೆಯ ಕಾರಣ ಪರಿಸರದಲ್ಲಿ ನಕಾರಾತ್ಮಕ ಅಂಶಗಳಷ್ಟೇ ಪಸರಿಸುವುದಿಲ್ಲ. ಶನಿ ಮತ್ತು ರಾಹು ಗ್ರಹಗಳ ಅವಕೃಪೆಗೂ ಕಾರಣವಾಗುತ್ತವೆ. 7. ಹೊರಗೆ ಹೋಗಿ ಮನೆಗೆ ಬಂದ ಕೂಡಲೇ ಕೈ ಕಾಲುಗಳನ್ನು ತೊಳೆದೇ ಮುಂದಿನ ಕಾರ್ಯಕ್ಕೆ ಅಣಿಯಾಗಬೇಕು. ಇದರಿಂದ ಮನಶ್ಯಾಂತಿ ದೊರೆಯುವುದಲ್ಲದೆ ಮನಸ್ಸಿಗೂ ನೆಮ್ಮದಿ ಉಂಟಾಗುತ್ತದೆ. ಮನೆಯೊಳಗೆ ಕ್ರಿಮಿಕೀಟಗಳು ಹೊರಗಿನಿಂದ ಪ್ರವೇಶಿಸುವುದು ತಡೆಯುತ್ತದೆ. ಮನೆ, ಮನದ ವಾತಾವರಣ ಉತ್ತಮವಾಗಿದ್ದರೆ ದೈವ ಕೃಪೆಯೂ ಬಂದೊದಗುತ್ತದೆ. 8. ಅನ್ನವನ್ನು ಬ್ರಹ್ಮ ಎನ್ನುತ್ತವೆ ವೇದಗಳು. ಇಲ್ಲಿ ಅನ್ನ ಎಂದರೆ ಬಳಸುವ ಆಹಾರ ಪದಾರ್ಥಗಳು. ಅಗತ್ಯವಿದ್ದಷ್ಟೇ ಆಹಾರ ಬಳಸಿ. ಮಿತ ಭುಕ್‌ ಹಿತ ಭುಕ್‌ ಎನ್ನುವ ಮಾತನ್ನು ನೆನಪಿನಲ್ಲಿ ಇಟ್ಟುಕೊಳ್ಳಿ. ಯಾರ ಮನೆಯಲ್ಲಿ ಅನ್ನವನ್ನು ಚೆಲ್ಲುತ್ತಾರೋ ಅಲ್ಲಿ ದಾರಿದ್ರ್ಯ ಲಕ್ಷ್ಮಿ ತಾಂಡವವಾಡುತ್ತಾಳೆ ಎನ್ನುವುದು ನೆನಪಿನಲ್ಲಿರಲಿ. ಎಲ್ಲರೂ ತಮ್ಮತಮ್ಮ ಅಭ್ಯಾಸಗಳನ್ನು ಗಮನಿಸಿ ಸೂಕ್ತವಾದ ಬದಲಾವಣೆ ಮಾಡಿಕೊಂಡು ಮನೆಗಳಲ್ಲಿ ಹಾಗೂ ಜೀವನದಲ್ಲಿ ಸುಖ-ಶಾಂತಿ, ನೆಮ್ಮದಿ ಪಡೆಯುವಂತಾಗಲಿ. ಸುಖ-ಶಾಂತಿ, ನೆಮ್ಮದಿ ಎಲ್ಲರಿಗೂ ಲಭಿಸಲಿ. ಇಂದು ನಡೆಯುತ್ತಿರುವ ಎಷ್ಟೋ ದೌರ್ಜನ್ಯಗಳು, ಆಘಾತಗಳು ಇಲ್ಲವಾಗಲಿ. * ಸೀತಾ. ಎಸ್‌ ನಾರಾಯಣ sangraha