ಮನೆ ಬೆಳಗುವ ಗೃಹಿಣಿ

ಗೃಹಿಣೀ ಗೃಹಮುಚ್ಯತೇ ವಧೂವರರ ಜಾತಕ ಕೂಡಿಸುವ ಮುನ್ನ ಕೇವಲ ಗುಣಗಳ ಹೊಂದಾಣಿಕೆಯತ್ತ ಗಮನ ಹರಿಸದೆ ಸ್ವಭಾವಗಳ ಹೊಂದಾಣಿಕೆಯತ್ತಲೂ ಗಮನ ಹರಿಸಬೇಕಾಗುತ್ತದೆ. ಗೃಹಿಣೀ ಗೃಹಮುಚ್ಯತೇ ಇಲ್ಲಿ ಬಳಕೆಯಾಗಿರುವ ಪದಗಳು ಗೃಹ, ಗೃಹಿಣಿ, ಗೃಹದ ಉನ್ನತಿ. ಸದ್ಗೃಹಿಣಿಯ ಸಹಕಾರವಿಲ್ಲದೇ ಗೃಹವು ಉನ್ನತ ಮಟ್ಟಕ್ಕೆ ಏರಲು ಸಾಧ್ಯವಿಲ್ಲ. ಒಂದು ಮನೆ ಸಾರ್ಥಕ ಗೃಹವೆನ್ನಿಸಿಕೊಳ್ಳಬೇಕಾದರೆ ಆ ಮನೆಗೆ ಪ್ರೀತಿ, ಸಾಮರಸ್ಯದ ತಳಪಾಯಬೇಕು. ಸೌಹಾರ್ದತೆ, ಔದಾರ್ಯ, ಸತ್ಯ ಅಹಿಂಸೆಗಳೇ ಆಧಾರವಾಗಿರಬೇಕು. ಒಂದು ಹೆಣ್ಣು ತವರು ಮನೆಯಲ್ಲಿ ಅಕ್ಕರೆಯ ಕೂಸಾಗಿ ಬೆಳೆದು ಮದುವೆಯ ತನ್ನದೇ ಆದ ಮನೆಗೆ ಗೃಹ ಪ್ರವೇಶ ಮಾಡುತ್ತಾಳೆ. ಆ ಮನೆಗೆ ಬೆಳಕಾಗುತ್ತಾಳೆ. ಹೀಗೆ ಮನೆಗೆ ಬೆಳಕಾಗಿ ಬರುವ ಘಟ್ಟದ ಮೇಲೆ ಜ್ಯೋತಿಷ್ಯಶಾಸ್ತ್ರವು ಬೆಳಕನ್ನು ಚೆಲ್ಲುತ್ತದೆ. ಸ್ತ್ರೀಯ ಜಾತಕ ವಿಮರ್ಶೆ ಮಾಡಿ ಅವಳ ಜಾತಕದಲ್ಲಿ ತತ್ವಗಳು, ಚಂದ್ರ ಇತರ ಗ್ರಹರ ಸ್ಥಿತಿ, ತ್ರಿಂಶಾಂಶ ಕುಂಡಲಿ ಮುಂತಾದ ವಿಚಾರಗಳ ಅವಲೋಕನದಿಂದ ಸ್ತ್ರೀಯ ಸ್ವಭಾವ, ಗುಣ ನಡತೆ ಅವಳ ಮನೋಭಾವ ಮತ್ತಿತರ ವಿಚಾರಗಳನ್ನು ತಿಳಿಸುತ್ತದೆ. ಪರಸ್ಪರ ಸ್ವಭಾವಗಳ ಹೊಂದಾಣಿಕೆಯೇ ಸುಖ ಸಂಸಾರಕ್ಕೆ ಬುನಾದಿ. ಹಾಗಾಗಿ ವಧೂವರರ ಜಾತಕಗಳಲ್ಲಿ ಮೊದಲು ಸ್ವಭಾವಗಳ ಹೊಂದಾಣಿಕೆಯತ್ತ ಗಮನ ಹರಿಸಬೇಕಾಗುವುದು. ಜಾತಕದಲ್ಲಿ ಪಂಚಭೂತ ತತ್ವ, ಯಾವ ತತ್ವವು ಪ್ರಧಾನವಾಗಿದೆ ಎಂದು ಅರಿಯಬೇಕು. ಅಗ್ನಿ ತತ್ವವು ವ್ಯಕ್ತಿಯಲ್ಲಿರುವ ಮುಂದಾಳತ್ವ, ಕೋಪ, ಉತ್ತಮ ಆರೋಗ್ಯ ಮುಂತಾದ ಅನೇಕ ವಿಚಾರಗಳನ್ನು ತಿಳಿಸಿದರೆ ಪೃಥ್ವಿ ತತ್ವವು ವ್ಯಕ್ತಿಯಲ್ಲಿರುವದ ಸಹನೆ ಕಷ್ಠ ಸಹಿಷ್ಣತೆಯ ಗುಣ ಆರ್ಥಿಕ ಬಯಕೆ, ಕಷ್ಟಪಟ್ಟು ದುಡಿಯುವ ವಿಚಾರ ಮುಂತಾದ ವಿಚಾರಗಳನ್ನು ತಿಳಿಸುವುದು. ಹಾಗೆಯೇ ವಾಯು ತತ್ವವು ಬುದ್ಧಿವಂತಿಕೆ, ಆಳವಾದ ಅಧ್ಯಯನ, ಯೋಜನಾ ಸಾಮರ್ಥ್ಯ‌, ಕಲ್ಪನಾ ಶಕ್ತಿ ಅತಿಯಾದ ಆಸೆ ಆಕಾಂಕ್ಷೆ ಮುಂತಾದ ವಿಚಾರಗಳನ್ನು ಅರುಹಿದರೆ ಜಲ ತತ್ವವು ವ್ಯಕ್ತಿಗಿರುವ ಭಾವನೆಗಳು, ಉದ್ವೇಗದ ಸ್ವಭಾವ ಸೇವಾ ಮನೋಭಾವ ಕಡಿಮೆ ರೋಗ ನಿರೋಧಕ ಶಕ್ತಿ ಮುಂತಾದ ವಿಚಾರಗಳನ್ನು ತಿಳಿಸುವುದು. ಹೀಗೆ ಜಾತಕ ಅವಲೋಕಿಸಿದಾಗ ನನ್ನ ಮಗಳ/ಮಗನ ಗುಣ ಸ್ವಭಾವದ ಪರಿಚಯ ನಮಗಾಗುವುದು. ಆಗ ಅವರ ಸ್ವಭಾವಕ್ಕೆ ಹೊಂದಿಕೆಯಾಗುವಂತಹ ತತ್ವ ಪ್ರಾಧಾನ್ಯತೆಯಿರುವ ವರ/ವಧುವಿನ ಜೊತೆಯಲ್ಲಿಅವರ ವಿವಾಹ ಮಾಡಿದರೆ ಸುಖ ಸಂಸಾರಕ್ಕೆ ನಾಂದಿಯಾಗುತ್ತದೆ. ಚಂದ್ರ: ಚಂದ್ರನನ್ನು ವಿಶ್ಲೇಷಿಸುವುದರ ಮೂಲಕ ಜಾತಕರ ಮನಸ್ಥಿತಿಯನ್ನು ಅರಿತುಕೊಳ್ಳಬಹುದು. ಚಂದ್ರನ ಸ್ಥಿತಿ ಬಲಯುತವಾಗಿದ್ದರೆ ಚಂದ್ರನಿಗೆ ಪಕ್ಷ ಬಲವಿದ್ದರೆ, ಚಂದ್ರನಿಗೆ ಯಾವುದೇ ಅಶುಭ ಗ್ರಹರ ಸಂಬಂಧವಿರದಿದ್ದರೆ ಜಾತಕರ ಮನಸ್ಥಿತಿಯೂ ಉತ್ತಮವಾಗಿರುವುದು. ಅದೇ ಚಂದ್ರನು ದುರ್ಬಲನಾಗಿದ್ದರೆ ವ್ಯಕ್ತಿಯ ಮನಸ್ಸು ದುರ್ಬಲವಾಗಿರುವುದು. ಸಪ್ತಗ್ರಹರು: ಜಾತಕಾವಲೋಕನವು ವ್ಯಕ್ತಿಯ ಸಮಗ್ರ ಚಿತ್ರಣವನ್ನು ತೆರೆದಿಡುವುದು. ಉದಾಹರಣೆಗೆ ನಾವಾಡುವ ಮಾತು ಬಿರುಸಾಗಿರುವುದೇ ಅಥವಾ ಮೃದುವಾಗಿರುವುದೇ ಹೀಗೆ ಮಾತಿನ ವೈಖರಿ, ಸಂವಹನಾ ಕಲೆ, ಅಂತರಂಗದ ಶುದ್ಧತೆ, ಕಾರ್ಯಕ್ಷೇತ್ರದ ವಿಚಾರ ಹೀಗೆ ಎಲ್ಲಾ ವಿಚಾರವನ್ನು ತಿಳಿಸುವುದು. ಆದ ಕಾರಣ ಹುಡುಗ ಹುಡುಗಿಯ ಜಾತಕ ಪರಿಶೀಲಿಸುವಾಗ ಜಾತಕದಲ್ಲಿ ಸಪ್ತಗ್ರಹರು 12 ಭಾವಗಳು ಪ್ರಾಧಾನ್ಯತೆ ಪಡೆಯುವುದರಿಂದ ಪ್ರತಿಯೊಂದು ಗ್ರಹಕ್ಕೂ ಗುಣಗಳನ್ನು ಅವಲೋಕಿಸಿ ಜಾತಕ ವಿಮರ್ಷಿಸಿದಾಗ ಜೀವನದ ಯಾವ ಕ್ಷೇತ್ರಗಳಲ್ಲಿ ಹೊಂದಾಣಿಕೆಯಾಗುವುದು, ಯಾವ ಕ್ಷೇತ್ರಗಳಲ್ಲಿ ಹೊಂದಾಣಿಕೆ ಆಗುವುದಿಲ್ಲ ಎಂದು ತಿಳಿದುಕೊಳ್ಳಬಹುದು. ಉದಾಹರಣೆಗೆ ಒಂದು ವ್ಯಕ್ತಿಯಲ್ಲಿ ಧರ್ಮಾಚರಣೆಯಲ್ಲಿ ಆಸಕ್ತಿ ಇರಬಹುದು ಮತ್ತೊಂದು ವ್ಯಕ್ತಿಯಲ್ಲಿ ಕಾಮ್ಯಾಸಕ್ತಿ ಅಧಿಕವಾಗಿರಬಹುದು. ಹಾಗಾಗಿ ಮದುವೆ ನಿರ್ಣಯಿಸುವ ಮುನ್ನ ಗುಣಗಳಿಗೆ ಪ್ರಾಧಾನ್ಯತೆ ಕೊಡದೆ ಗುಣಗಳಿಗಿಂತಲೂ ಪ್ರಧಾನವಾಗಿರುವ ತತ್ವಗಳ ಮೂಲಕ ಹುಡುಗ ಹುಡುಗಿಯ ಜಾತಕ ವಿಮರ್ಶೆ ಮಾಡಬೇಕಾಗುವುದು. ಇಬ್ಬರ ಜಾತಕಗಳಲ್ಲಿ ಚಂದ್ರನ ಬಲಾಬಲ ತಿಳಿದುಕೊಳ್ಳುವುದು, ಗುಣಗಳನ್ನು ಪ್ರತಿಯೊಂದು ಗ್ರಹಕ್ಕೂ ಅಳವಡಿಸಿ ಜಾತಕ ವಿಮರ್ಷಿಸುವುದು, ತ್ರಿಂಶಾಂಶ ಕುಂಡಲಿಯನ್ನು ಅವಲೋಕಿಸುವುದು. ಹೀಗೆ ಎಲ್ಲಾ ವಿಧಾನಗಳನ್ನು ಅನುಸರಿಸಿ ಹುಡುಗ ಹುಡುಗಿಯ ಜಾತಕ ಹೊಂದಾಣಿಕೆ ಮಾಡಿದರೆ ಸುಖ ಸಂಸಾರಕ್ಕೆ ಬುನಾದಿಯಾಗಿ ಅನೇಕ ಮಹಾ ವ್ಯಕ್ತಿಗಳು ಉದಿಸುವರು. ಆದ ಕಾರಣ ಕೇವಲಚಂದ್ರನನ್ನು ಆಧಾರವಾಗಿಟ್ಟು ಕೊಂಡು ಗುಣಗಳನ್ನು ಅವಲೋಕಿಸಿ ಜಾತಕ ಹೊಂದಾಣಿಕೆಯಾಗುವುದಿಲ್ಲ ಎಂದು ಹೇಳಿ ಆಗಲಿರುವ ಮದುವೆಗಳನ್ನು ತಪ್ಪಿಸುವ ತಪ್ಪು ಕೆಲಸವೂ ಜ್ಯೋತಿಷಿಗಳಿಂದ ಆಗಬಾರದು. ಕೇವಲ ಗುಣಗಳು ಹೊಂದಿಕೆಯಾಗುವುದಿಲ್ಲ ಅಥವಾ ಕುಜ ದೋಷವಿದೆ ಎಂಬ ಕಾರಣಗಳಿಂದ ನಿಂತು ಹೋಗುವ ಅನೇಕ ವಿವಾಹಗಳಿಗೆ ಅವಕಾಶವಿರುವುದಿಲ್ಲ. * ಡಾ. ಮಂಜುಳಾ ಬಿ. ಐಥಾಳ್‌ sangraha