ಸರ್ಪದೋಷ ಬೇಡ ಭಯ

ಒಬ್ಬರ ಅಶಕ್ತತೆ ಮತ್ತೊಬ್ಬರ ಪಾಲಿನ ತುತ್ತು. ಅಂತಹ ಸಂಗತಿಗೆ ಸರ್ಪದೋಷ ಅದರೊಂದಿಗಿನ ಭಯ ಸ್ಪಷ್ಟ ನಿದರ್ಶನವೆಂದರೆ ತಪ್ಪಲ್ಲ. ವಾಸ್ತವವಾಗಿ ಸರ್ಪದೋಷದ ಅರಿವೇ ಇಲ್ಲದಿರುವುದು ಅಂತಹದ್ದೊಂದು ಭೀತಿಗೆ ಕಾರಣವಾಗಿದೆ. ಎಲ್ಲ ಸಮಸ್ಯೆಗೂ ಸರ್ಪವನ್ನೇ ದೂರುವ ಬದಲು ಸ್ವಲ್ಪ ವಿವೇಚಿಸಿ, ವಿಶ್ಲೇಷಿಸಿ ಮುನ್ನಡೆಯಿರಿ.ವೈಜ್ಞಾನಿಕ ವಿಶ್ಲೇಷಣೆಗೆ ನಿಲುಕದ ಸರ್ಪದೋಷದ ಬಗ್ಗೆ ಇನ್ನಿಲ್ಲವಾದ ವಾದ, ವಿವಾದಗಳಿವೆ. ಕೆಲ ಜ್ಯೋತಿಷಿಗಳು ತಮ್ಮ ಮೂಗಿನ ನೇರಕ್ಕೆ ಸರ್ಪದೋಷವನ್ನು, ತತ್‌ ಸಂಬಂಧಿತ ಪರಿಹಾರವನ್ನು ವ್ಯಾಖ್ಯಾನಿಸುತ್ತಿರುವುದು ಕಂಡು ಬಂದಿದೆ. ಸರ್ಪದೋಷದ ಬಗ್ಗೆ ಹೇಳುವಾಗ ಸ್ವಲ್ಪ ಮಟ್ಟಿಗಾದರೂ ಪ್ರಾಮಾಣಿಕತೆ ಇರಬೇಕು ಎನ್ನುವುದು ನನ್ನ ಅನಿಸಿಕೆ. ಸರ್ಪದೋಷವನ್ನು ಐದು ಭಾಗವಾಗಿ ವಿಂಗಡಿಸಬಹುದು. ಅದೆಂದರೆ, ಕಾಳಸರ್ಪಯೋಗ, ಸರ್ಪಯೋಗ, ಕಾಳಸರ್ಪದೋಷ, ಸರ್ಪದೋಷ ಮತ್ತು ಸರ್ಪಶಾಪ. ಕಾಳಸರ್ಪಯೋಗ ಜಾತಕನ ಕುಂಡಲಿಯಲ್ಲಿ ಕೇತುವಿನಿಂದ ರಾಹುವರೆಗೆ ಅಪ್ರದಕ್ಷಿಣಾಕಾರವಾಗಿ ಲಗ್ನಸೇರಿ ಏಳು ಗ್ರಹಗಳು ಕಂಡರೆ ಕಾಳಸರ್ಪ ಯೋಗ ಎನ್ನುವುದು ಕೆಲವರ ಅಭಿಪ್ರಾಯ. ಆದರೆ ಕಾಳಸರ್ಪ ಯೋಗವು ಬಾಲ್ಯದಲ್ಲಿ ಮಾತ್ರ ಪೀಡಕವಾಗಿದ್ದು ನಂತರ ಅವರು ಉತ್ತಮ ಜೀವನ ನಡೆಸುತ್ತಾರೆ. ಸರ್ಪಯೋಗ ಇದೊಂದು ನಾಭಸ ಯೋಗವಾಗಿದ್ದು, ಎಲ್ಲ ಪಾಪ ಗ್ರಹರು ಕೇಂದ್ರದಲ್ಲಿದ್ದು, ಶುಭಗ್ರಹರು ದುಃಸ್ಥಾನಗಳಲ್ಲಿದ್ದರೆ ಸರ್ಪಯೋಗ. ಫಲ- ಕ್ರೂರಿ, ದರಿದ್ರ, ದುಃಖಿತ, ಪರಾನ್ನಜೀವಿ, ಕುಟಿಲ. ಇದಕ್ಕೆ ಪರಿಹಾರ ಸೂಚಿಸಿಲ್ಲ. ಕಾಳಸರ್ಪ ದೋಷ ರಾಹುವಿನಿಂದ ಕೇತು ಒಳಗೆ ಅಪ್ರದಕ್ಷಿಣಾಕಾರವಾಗಿ ಎಲ್ಲ ಏಳು ಗ್ರಹರು ಮತ್ತು ಲಗ್ನವಿದ್ದರೆ ಕಾಳಸರ್ಪದೋಷ. ಜ್ಯೋತಿಷ ರತ್ನಾಕರ, ಜಾತಕ ಫಲ ಸಾರೋದ್ಧಾರ ಮತ್ತಿತರ ಗ್ರಂಥಗಳು ಮಾತ್ರ ಈ ದೋಷವನ್ನು ಉಲ್ಲೇಖಿಸಿವೆ. ಆದರೆ ಪರಾಶರ, ವರಾಹ ಮಿಹಿರ, ಭಟ್ಟೋತ್ಪಲ, ದುಂಡೀರಾಜ, ಮಾನಸಾಗರಿ, ಸಾರವಳಿ, ಜಾತಕ ಪಾರಿಜಾತ ಗ್ರಂಥಗಳಲ್ಲಿ ಕೇವಲ ಸರ್ಪಯೋಗ ಮತ್ತು ಸರ್ಪಶಾಪದ ಉಲ್ಲೇಖವಿದೆ. ಇನ್ನು ಲಗ್ನದಿಂದ ಹನ್ನೆರಡು ಭಾವಗಳಲ್ಲಿ ರಾಹು ಇರುವಾಗ ಇದನ್ನು ಕ್ರಮವಾಗಿ ಹನ್ನೆರಡು ಸರ್ಪದೇವತೆಗಳ ಹೆಸರಿನಿಂದ ಕರೆಯಲಾಗಿದೆ. 1. ಅನಂತ 2. ಕುಳಿಕ 3. ವಾಸುಕಿ, 4. ಶಂಖುಫಲ, 5. ಪದ್ಮ, 6. ಮಹಾಪದ್ಮ, 7. ತಕ್ಷ ಕ, 8. ಕಾರ್ಕೋಟಕ, 9. ಶಂಖಚೂಡ, 10. ಘಟಕ, 11. ವಿಶಾಧನ, 12. ಶೇಷನಾಗ. ಇಲ್ಲಿ ಕ್ರಮವಾಗಿ 27,33,36,42,48,54 ವರ್ಷಗಳ ನಂತರ ಎರಡು ಆವರ್ತಿಗಳಲ್ಲಿ ಕ್ರಮವಾಗಿ 1-6 ಮತ್ತು 7-12 ರಾಶಿಗಳವರಿಗೆ(ಲಗ್ನ) ಪ್ರಗತಿಯಾಗುತ್ತದೆಂದು ಎಂದು ಹೇಳಲಾಗಿದೆ. ತಡವಾಗಿ ಮದುವೆ, ದಾಂಪತ್ಯ ಸಮಸ್ಯೆ, ಆರೋಗ್ಯ ಸಮಸ್ಯೆ, ಪ್ರಗತಿಗಾಗಿ ಹೋರಾಟ, ಪಿತ್ರಾರ್ಜಿತ ಆಸ್ತಿ ಹಾನಿ, ಮಕ್ಕಳಿಂದ ತೊಂದರೆ ಇತ್ಯಾದಿ ಆಯಾಭಾವ ಆಧಾರಿತವಾಗಿ ಸಂಕಷ್ಟ ಫಲ ಹೇಳಲಾಗಿದೆ. ಸರ್ಪದೋಷ ಗುರುವಿನ ಕೇಂದ್ರದಲ್ಲಿ ರಾಹು ಇದ್ದರೆ ಸರ್ಪದೋಷವೆಂದು ಹೇಳಲಾಗಿದೆ. ಇಲ್ಲಿ ಗುರುವಿಗೆ ರಾಹು ಕಾರಕ ಗ್ರಹ ನಾಗುವುದರಿಂದ ಗುರುವಿನ ಫಲ ಹಾಳು ಮಾಡುತ್ತಾನೆ ಎಂದಿದ್ದಾರೆ. ಫಲ ಗುರು ಸ್ಥಿತ ಭಾವದ ಮೇಲೆ ಅವಲಂಬಿಸಿದೆ. ಇದು ಗುರು ಚಾಂಡಾಲ ಯೋಗದ ಇನ್ನೊಂದು ರೂಪ. ಇಲ್ಲಿಯೂ ರಾಹು ಶಾಂತಿ ಆಥವಾ ಸರ್ಪದೋಷ ಶಾಂತಿ ಮಾಡಿಸಬೇಕಾಗಿ ಹೇಳಲಾಗಿದೆ. ಪರಾಶರರು ಇದನ್ನು ಯೋಗವಾಗಿ ಹೇಳಿದ್ದು ಶುಭ ಬಲಯುತ ಗ್ರಹರಿಗೆ (ಉಚ್ಛ, ಮೂಲ ತ್ರಿಕೋಣಾದಿ) ಮಾತ್ರ ಅನ್ವಯಿಸಿದ್ದಾರೆ. ವರಾಹರು ಇದನ್ನು ಪಾಪಗ್ರಹರಿಗೂ ಅನ್ವಯಿಸಿದ್ದು ಅಶುಭ ಫಲ ಹೇಳಬೇಕೆಂದಿದ್ದಾರೆ. ಆದರೆ ರಾಹು, ಕೇತುಗಳ ಪ್ರಸ್ತಾಪವಿಲ್ಲ. ಸರ್ಪಶಾಪ ಇದು ಸಂತತಿ ವಿಚಾರವಾಗಿ ಅನ್ವಯವಾಗುತ್ತದೆ. ಅ) ರಾಹು ಪಂಚಮ ಸ್ಥಿತನಾಗಿ ಕುಜ ದೃಷ್ಟನಾದರೆ ಅಥವ ರಾಹು ಕುಜನ ರಾಶಿ ಸ್ಥಿತನಾಗಿದ್ದರೆ, ಆ) ಗುರು ಕುಜ ಯುತಿಯಲ್ಲಿದ್ದು, ಲಗ್ನಾಧಿಪತಿ ರಾಹು ಯುತಿಯಲ್ಲಿದ್ದು, ಪಂಚಮಾಧಿಪತಿ ದುಃಸ್ಥಾನ (6,8,12)ದಲ್ಲಿದ್ದರೆ, ಇ) ಪಂಚಮಾಧಿಪತಿ ಬುಧ ಅಥವ ಕುಜನ ನವಾಂಶದಲ್ಲಿ ಕುಜಯುತನಾಗಿದ್ದರೆ ಅಥವ ಲಗ್ನ ರಾಹು, ಗುಳಿಕಯುತವಾಗಿದ್ದರೆ ಈ) ಪಂಚಮ ಕುಜನ ರಾಶಿಯಾಗಿ ರಾಹು, ಕುಜ, ಬುಧರು ಸ್ಥಿತರಾದರೆ ಅಥವ ಇವರಿಗೆ ಬುಧ ದೃಷ್ಟಿ ಇದ್ದರೆ ಉ) ಲಗ್ನಾಧಿಪತಿ ರಾಹುಯುತ, ಪಂಚಮಾಧಿಪ ಕುಜ ಯುತ, ಗುರು ರಾಹು ಯುತವಾದರೆ ಊ) ಪಂಚಮದಲ್ಲಿ ರವಿ, ಕುಜ, ಶನಿ, ರಾಹು, ಬುಧ, ಗುರುವಿದ್ದು ಪಂಚಮಾಧಿಪತಿ ಬಲಹೀನನಾದರೆ, ಸರ್ಪಶಾಪ ಹೇಳಲಾಗಿದೆ.(ಪರಾಶರ) ಇದಕ್ಕೆ ನಾಗ ಮೂರ್ತಿ ದಾನ, ನಾಗ ಪ್ರತಿಷ್ಠೆ, ಆಶ್ಲೇಷಾ ಬಲಿ ಇತ್ಯಾದಿ ಪರಿಹಾರ ಹೇಳಲಾಗಿದೆ. ಹಾಗಾಗಿ ಜ್ಯೋತಿಷಿಗಳು ಎಲ್ಲದಕ್ಕೂ ಸರ್ಪದೋಷ, ಕಾಳ ಸರ್ಪದೋಷ ಎಂದು ಭೀತಿಪಡಿಸುವ ಬದಲು ಸರಿಯಾದ ನಿರ್ಣಯ ತೆಗೆದುಕೊಳ್ಳಬೇಕು. ಡಾ. ಅನಂತ ಜಿ. ಪಂಡಿತ್‌ sangraha