ಗ್ರಹದೋಷ ನಿವಾರಕ ಶ್ರಾವಣ ಮಾಸ

ಚಂದ್ರಗ್ರಹ ಹುಣ್ಣಿಮೆ ದಿನ ಶ್ರವಣ ನಕ್ಷತ್ರದಲ್ಲಿರುವನು. ಆಗ ಆ ಮಾಸವನ್ನು ಶ್ರಾವಣ ಮಾಸ ಎನ್ನುವರು. ಈ ಮಾಸದಲ್ಲಿ ಹಬ್ಬಗಳು ಹಾಗೂ ವ್ರತಗಳ ಸಾಲು ಸಾಲೇ ಬರುವುದು. ಹಾಗಾಗಿ ಮಕ್ಕಳಿಂದ ಹಿಡಿದು ಮಹಿಳೆಯರವರೆಗೆ ಎಲ್ಲರಿಗೂ ಸಂಭ್ರಮ. ಆದ್ದರಿಂದ ಈ ಮಾಸವನ್ನು ಹಬ್ಬಗಳ ಮಾಸ ಎನ್ನುವರು. ಈ ಮಾಸದಲ್ಲಿ ಬರುವ ಹಬ್ಬ ಮತ್ತು ವ್ರತಗಳನ್ನು ಆಚರಿಸುವುದರಿಂದ ಜಾತಕದಲ್ಲಿರುವ ಗ್ರಹದೋಷವನ್ನು ನಿವಾರಣೆ ಮಾಡಿಕೊಳ್ಳಬಹುದು. ಈ ಮಾಸದಲ್ಲಿ ಬರುವ ಹಬ್ಬಗಳ ಬಗ್ಗೆ ಮಾಹಿತಿ ಇಲ್ಲಿದೆ: ನಾಗರ ಪಂಚಮಿ: ಜಾತಕದಲ್ಲಿ ನಾಗದೋಷ, ರಾಹುದೋಷ, ಆಶ್ಲೇಷ ನಕ್ಷತ್ರ ದೋಷ, ಕೇತು ದೋಷ ಇದ್ದರೆ ಸಂತಾನ ಭಾಗ್ಯಕ್ಕೆ ನಾಗದೋಷ, ಮಾಂಗಲ್ಯ ಭಾಗ್ಯಕ್ಕೆ ನಾಗದೋಷ ಇದ್ದರೆ ನಾಗರ ಪಂಚಮಿ ದಿನ ನಾಗನ ಕಲ್ಲಿಗೆ ಹಾಲು ಎರೆಯಬೇಕು. ರಾಹು ಹಾಗೂ ಕೇತು ಶಾಂತಿ ಮಾಡಿಸುವುದರಿಂದ ನಾಗ ದೋಷ ಪರಿಹಾರ ಆಗುವುದು. ಸಿರಿಯಾಳ ಷಷ್ಠಿ: ಈ ಹಬ್ಬವನ್ನು ಗಂಡು ಮಕ್ಕಳು ಇರುವ ತಾಯಂದಿರು ಆಚರಿಸುತ್ತಾರೆ. ಜಾತಕದಲ್ಲಿ ಗಂಡು ಮಕ್ಕಳ ಸಂತತಿಗೆ ದೋಷ ಇದ್ದರೆ, ಗಂಡು ಮಕ್ಕಳು ಹುಟ್ಟಿ ಮರಣ ಹೊಂದುತ್ತಿದ್ದರೆ ಅಂಥವರು ಈ ಸಿರಿಯಾಳ ಷಷ್ಠಿ ದಿನ ಭಕ್ತ ಸಿರಿಯಾಳನ ಪೂಜೆ ಮಾಡಿ ಹಸಿ ತರಕಾರಿಗಳನ್ನು ದಾನ ಮಾಡುವುದರಿಂದ ಗಂಡು ಮಕ್ಕಳನ್ನು ಪಡೆಯಬಹುದು. ವರ ಮಹಾಲಕ್ಷ್ಮಿ ವ್ರತ: ಈ ಹಬ್ಬದಂದು ಲಕ್ಷ್ಮಿಯನ್ನು ವಿಶೇಷವಾಗಿ ಪೂಜಿಸುವರು. ಲಕ್ಷ್ಮಿಯಲ್ಲಿ ಎರಡು ವಿಧ. ಸ್ಥಿರಲಕ್ಷ್ಮಿ, ಚರಲಕ್ಷ್ಮಿ. ಎಲ್ಲರೂ ಬಯಸುವುದು ಸ್ಥಿರಲಕ್ಷ್ಮಿಯನ್ನು. ಲಕ್ಷ್ಮಿಗೆ ಶುಕ್ರಗ್ರಹ ಅಧಿಪತಿ. ಶುಕ್ರ ಗ್ರಹ ನೀಚನಾಗಿದ್ದರೆ, ಶುಕ್ರನಿಗೆ ಪಾಪಗ್ರಹಗಳ ದೃಷ್ಟಿ ಇದ್ದರೆ ಅಥವಾ ಪಾಪಗ್ರಹಗಳ ಜೊತೆಯಲ್ಲಿದ್ದರೆ ಎರಡನೇ ಭಾವದಲ್ಲಿ ಪಾಪಗ್ರಹಗಳಿದ್ದರೆ ಲಕ್ಷ್ಮಿಯ ಭಾಗ್ಯ ಕಡಿಮೆ. ಅಂಥವರು ವರಮಹಾಲಕ್ಷ್ಮಿ ವ್ರತವನ್ನು ಮಾಡಿ ಲಕ್ಷ್ಮಿಯ ಕೃಪೆಗೆ ಪಾತ್ರರಾಗಬಹುದು. ರಕ್ಷಾಬಂಧನ: ಇದು ಸಹೋದರಿ-ಸಹೋದರರ ಹಬ್ಬ. ಜಾತಕದಲ್ಲಿ ಮೂರನೇ ಭಾವದಿಂದ ಸಹೋದರ ಸಹೋದರಿಯ ವಿಚಾರ ತಿಳಿಯಬಹುದು. ಲಗ್ನಾಧಿಪತಿ ಮೂರನೇ ಭಾವದ ಅಧಿಪತಿ ಶತ್ರುಗ್ರಹವಾಗಿದ್ದರೆ ಸಹೋದರ ಸಹೋದರಿಯರಲ್ಲಿ ಭಿನ್ನಾಭಿಪ್ರಾಯ ಇರುವುದು. ಆ ಗ್ರಹಕ್ಕೆ ತನ್ನ ಶಾಂತಿಯನ್ನು ಆ ದಿನ ಆಚರಿಸಿದರೆ ಬಾಂಧವ್ಯ ಜೀವನ ಪರ್ಯಂತ ಉತ್ತಮವಾಗಿರುವುದು. ಗಾಯತ್ರಿ ಪ್ರತಿಪಾತ್‌: ಶ್ರಾವಣ ಮಾಸದ ಕೃಷ್ಣ ಪಕ್ಷದ ಪಾಡ್ಯ ದಿನ ಗಾಯತ್ರಿ ಪ್ರತಿಪಾತ್‌ ಆಚರಿಸುವರು. ಯಾವುದೇ ಮಂತ್ರ ಸಿದ್ಧಿ ಆಗಬೇಕಾದರೆ ಲಗ್ನದಿಂದ 9ನೇ ಮನೆ ಉತ್ತಮವಾಗಿರಬೇಕು (ಗುರು ಇರಬೇಕು). 2ನೇ ಮನೆ ಅಧಿಪತಿ ಉಚ್ಚನಾಗಿದ್ದರೆ ಮಂತ್ರ ಸಿದ್ಧಿಯಾಗುವುದು. ಆ ದಿನ ಸಿದ್ಧಿಗಾಗಿ ಗಾಯತ್ರಿ ಹೋಮ ಮತ್ತು ಜಪ ಮಾಡಿದರೆ ದೋಷವು ಪರಿಹಾರ ಆಗುವುದು. ರಾಘವೇಂದ್ರ ಸ್ವಾಮಿಗಳ ಆರಾಧನೆ: ಯಾವುದೇ ವಿದ್ಯೆ ಕಲಿಯಬೇಕಾದರೂ ಗುರುವಿನ ಅನುಗ್ರಹ ಮುಖ್ಯ. ಗುರು ಗ್ರಹ ನೀಚ ಅಥವಾ ಪಾಪ ಗ್ರಹಗಳ ಜತೆಯಲ್ಲಿ ಇದ್ದರೆ ವಿದ್ಯೆ ಸುಲಭವಾಗಿ ಬರುವುದಿಲ್ಲ. ಆದ್ದರಿಂದ ರಾಘವೇಂದ್ರ ಸ್ವಾಮಿಗಳ ಆರಾಧನೆ ದಿನ ಹಾಗೂ ಪ್ರತಿ ಗುರುವಾರ ಶಿರಡಿ ಸಾಯಿಬಾಬ ಅವರ ಪೂಜೆ ಮಾಡಿದರೆ ಅಥವಾ ಅವರಿಗೆ ಸಂಬಂಧಪಟ್ಟ ಜನ ಮಾಡಿದರೆ ದೋಷವೂ ಪರಿಹಾರ ಆಗುವುದು. ಮಂಗಳಗೌರಿ ವ್ರತ: ಶ್ರಾವಣ ಮಾಸದ ಮೊದಲ ಮಂಗಳವಾರದಿಂದ ಕೊನೆಯ ಮಂಗಳವಾರದವರೆಗೆ (ಪ್ರತಿ ಮಂಗಳವಾರ) ಮಂಗಳ ಗೌರಿ ವ್ರತವನ್ನು ಮಾಡುವರು. ಜಾತಕದಲ್ಲಿ 7 ಮತ್ತು 8ನೇ ಮನೆಗಳಲ್ಲಿ ಪಾಪಗ್ರಹ ಅಥವಾ ಪಾಪಗ್ರಹದ ದೃಷ್ಟಿ -ಕುಜಗ್ರಹದ ದೃಷ್ಟಿ ಇದ್ದರೆ ಮಾಂಗಲ್ಯಭಾಗ್ಯಕ್ಕೆ ತೊಂದರೆ ಬರಬಹುದು. ಆದ್ದರಿಂದ ಮಂಗಳಗೌರಿ ವ್ರತ ಪೂಜೆಯನ್ನು ಮಾಡಿದರೆ ದೋಷ ಪರಿಹಾರ ಆಗುವುದು. ಶ್ರಾವಣ ಶನಿವಾರ: ಪ್ರತಿ ಶ್ರಾವಣ ಶನಿವಾರದಂದು ಕುಲ ದೇವತೆ ವೆಂಕಟರಮಣ ಸ್ವಾಮಿಯ ಒಕ್ಕಲಿನವರು ಪಡಿ ಬೇಡುತ್ತಾರೆ. ಅಂದರೆ ಅಕ್ಕಪಕ್ಕದ ಮನೆಗೆ ಹೋಗಿ ಭಿಕ್ಷೆ ಬೇಡುವುದು. ಜಾತಕದಲ್ಲಿ ಕುಜ ಗ್ರಹ ಲಗ್ನದಲ್ಲಿ ಇದ್ದರೆ ಅಹಂಕಾರ ಹೆಚ್ಚು. ಪಡಿ ಕೇಳುವುದರಿಂದ ಅಹಂ, ಕೋಪ ತಾಪ ಕಡಿಮೆಯಾಗುವುದು. ದೋಷ ಪರಿಹಾರವೂ ಆಗುತ್ತದೆ. *ಮಂಡಗದ್ದೆ ಪ್ರಕಾಶ ಬಾಬು sangraha