ಜನವರಿ ಒಂದನೇ ದಿನಾಂಕವನ್ನು ಹೊಸ ವರ್ಷದ ಹೊಸ ದಿನ ಎಂದು ಎಲ್ಲರೂ ಆಚರಿಸುತ್ತಾರೆ. ಹಿಂದೂ ಪಂಚಾಂಗದ ಜ್ಯೋತಿಷಶಾಸ್ತ್ರ ಆಧರಿತದಲ್ಲಿ ಜ.1 ಮಾತ್ರ ಹೊಸ ದಿನವಲ್ಲ. ಅದಕ್ಕೆ ಕೆಲವು ಕಾರಣಗಳೂ ಇವೆ. ಪಂಚಾಂಗದಲ್ಲಿ ತಿಥಿ, ವಾರ, ನಕ್ಷತ್ರ, ಯೋಗ ಮತ್ತು ಕರಣ ಎಂಬ 5 ಅಂಶಗಳು ಇರುವುದು. ತಿಥಿಯಾಗಲಿ, ಯೋಗವಾಗಲಿ, ಕರಣವಾಗಲಿ, ವಾರವಾಗಲಿ, ನಕ್ಷತ್ರವಾಗಲಿ ಅವು ಒಂದು ಕಳೆದು ಮತ್ತೊಂದು ಬಂದಾಗ ಹೊಸದಾಗಿರುತ್ತದೆ. ಈ ದಿನದ ವಾರ ಮುಂದಿನ ವಾರ ಬಂದರೆ ತಿಥಿ, ಯೋಗ ಬೇರೆ ಬೇರೆಯಾಗಿರುತ್ತದೆ. ಅಂದರೆ ಪ್ರತಿ ದಿನದ ಕ್ಷಣ ಕ್ಷಣವೂ ಹೊಸದಾಗಿರುತ್ತದೆ. ಈ ಕಾರಣದಿಂದ ಜ್ಯೋತಿಷದ ಪಂಚಾಂಗದ ಪ್ರಕಾರ ಪ್ರತಿ ದಿನವೂ ಹೊಸ ದಿನವೇ ಆಗುವುದು. ತಿಥಿಗಳು:ಒಟ್ಟು 15 ತಿಥಿಗಳಿವೆ. ಈ 15 ತಿಥಿಗಳು ಪ್ರತಿ ದಿನವೂ ಬದಲಾವಣೆ ಆಗುತ್ತದೆ. ಹೀಗಾಗಿ ದಿನವೂ ಹೊಸ ದಿನವೇ ಆಗುವುದು. ನಕ್ಷತ್ರಗಳು:ಒಟ್ಟು 27 ಇವೆ. ಈ 27 ನಕ್ಷತ್ರಗಳು ಪ್ರತಿ ದಿನ ಅಥವಾ ಎರಡು ದಿನಕ್ಕೆ ಒಂದು ಬಾರಿ ಬದಲಾವಣೆ ಆಗುವುದು. ಹೀಗಾಗಿ ದಿನವೂ ಹೊಸ ದಿನವೇ ಆಗುವುದು. ಯೋಗಗಳು:ಒಟ್ಟು 27 ಇವೆ. ಈ 27 ಯೋಗಗಳು ಪ್ರತಿ ದಿನ ಬದಲಾವಣೆ ಆಗುವುದು. ಹೀಗಾಗಿ ದಿನವೂ ಹೊಸ ದಿನವೇ ಆಗುವುದು. ಕರಣ:ಒಟ್ಟು 11 ಕರಣಗಳು ಇವೆ. ಈ 11 ಕರಣಗಳು ಪ್ರತಿದಿನವೂ ಬದಲಾವಣೆ ಆಗುವುದು. ವಾರಗಳು:ವಾರಗಳು ಒಟ್ಟು ಏಳು. ಈ ಏಳು ವಾರಗಳು ಪ್ರತಿ ದಿನವೂ ಬದಲಾಣೆಯಾಗುವುದರಿಂದ ಪ್ರತಿ ದಿನವೂ ಹೊಸತೆ. ಸಮಯ: ನಾವು ಕಳೆಯುವ ಪ್ರತಿ ಸಮಯವು ಮತ್ತೆ ಬಾರದು. ಹೀಗಾಗಿ ಪ್ರತಿ ಸಮಯವೂ ಹೊಸತೆ. ಮನುಷ್ಯನ ಆಯುಸ್ಸು 120 ವರ್ಷ:ಜ್ಯೋತಿಷಶಾಸ್ತ್ರದ ಪ್ರಕಾರ ಮನುಷ್ಯನ ದೀರ್ಘಾಯಸ್ಸು 120 ವರ್ಷಗಳು. 9 ಗ್ರಹಗಳ ಒಟ್ಟು ದೆಸೆ 120 ವರ್ಷಗಳು. ಅವು ಯಾವುವು ಎಂದರೆ ರವಿ 6 ವರ್ಷ, ಚಂದ್ರ ದೆಸೆ 10 ವರ್ಷ, ಕುಜ ದೆಸೆ 7, ಬುಧ ದೆಸೆ 17, ಗುರು ದೆಸೆ 16, ಶುಕ್ರ ದೆಸೆ 20, ಶನಿ ದೆಸೆ 19, ರಾಹು ದೆಸೆ 18, ಕೇತು ದೆಸೆ 7. 60 ವರ್ಷ ತುಂಬಿದ ವ್ಯಕ್ತಿಗೆ ಷಷ್ಟಾಬ್ದಿ ಶಾಂತಿಯನ್ನು ಮಾಡುತ್ತಾರೆ. ಅಂದರೆ ಅವರ ಅರ್ಧ ಆಯಸ್ಸು ಕಳೆಯಿತು ಎಂದು. ಈ 60 ವರ್ಷದಲ್ಲಿ ಸಾಮಾನ್ಯವಾಗಿ ಶೇ.75 ಭಾಗ ನಿದ್ರೆಯಲ್ಲಿ ಕಳೆದಿರುತ್ತೇವೆ. ಉಳಿದ ಶೇ.25 ಭಾಗದಲ್ಲಿ ಒಂದು ಭಾಗವನ್ನು ಸಹ ಸತ್ಕಾರ್ಯಕ್ಕೆ ಉಪಯೋಗಿಸಿರುವುದು ಕಷ್ಟವೇ. ಜ್ಯೋತಿಷ ಆಧರಿತ 120 ವರ್ಷ ಇದ್ದರೂ ಉತ್ತಮ ಆರೋಗ್ಯ ಇದ್ದರೆ ಮಾತ್ರ ಅಷ್ಟು ವರ್ಷಗಳು ಜೀವಿಸಲು ಸಾಧ್ಯ. ಪ್ರತಿ ದಿನವೂ ಹೊಸ ವರ್ಷದ ದಿನ ಎಂದು ತಿಳಿದು ಸಮಯವನ್ನು ವ್ಯರ್ಥ ಮಾಡದೇ ಉತ್ತಮ ಜೀವನ ನಡೆಸುವುದು ನಮ್ಮ ಧರ್ಮ.