ಅಂಗೈಯಲ್ಲೇ ಮಹಾಯೋಗ

ಯೋಗ ಎಂದರೆ ಒಬ್ಬ ವ್ಯಕ್ತಿ ಜನಿಸಿದ ಮೇಲೆ ಅವರು ಪಡೆದುಕೊಂಡು ಬಂದಿರುವ ಉತ್ತಮ ಮಟ್ಟದ ಜೀವನ, ಒಳ್ಳೆಯ ಮಕ್ಕಳು, ಪ್ರೀತಿಸುವ ಮಡದಿ, ಸುಖಕರವಾದ ಜೀವನ. ಇಂತಹ ಜೀವನ ನಡೆಸಲು ಹಣ, ಆಸ್ತಿ, ಐಶ್ವರ್ಯ, ವಾಹನ ಈ ಎಲ್ಲಾ ಸುಖ ಜೀವನ ನಡೆಸಲು ಮುಖ್ಯವಾಗಿ ಬೇಕಾಗಿರುವ ಆರೋಗ್ಯ ಮತ್ತು ಉತ್ತಮ ಆಯಸ್ಸು, ಇಂತಹ ಆಯಸ್ಸು, ಆರೋಗ್ಯ, ಐಶ್ವರ್ಯ ಪಡೆಯಲು ಯೋಗವೇ ಮುಖ್ಯ ಕಾರಣ ಎನ್ನುತ್ತದೆ ಜ್ಯೋತಿಷ. ಒಂದೊಮ್ಮೆ ಹಸ್ತದಲ್ಲಿ ಪ್ರತಿಬಂಧಕ ಯೋಗವಿದ್ದರೆ ಅವನ ಪರಿಸ್ಥಿತಿ ಕೈಗೆಟುಕದ ದ್ರಾಕ್ಷಿ ಹುಳಿ ಎಂಬಂತಾಗಿರುತ್ತದೆ. ಯಾವುದೇ ವ್ಯಕ್ತಿಯ ಹಸ್ತದಲ್ಲಿ ಗುರು ಬೆರಳು, ರವಿ ಬೆರಳಿಗೆ ಸಮನಾಗಿ ಇದ್ದು, ನೋಡಲು ಅಂದವಾಗಿ ಇದ್ದು ಜೊತೆಗೆ ಗುರುಪರ್ವ ಉತ್ತಮವಾಗಿದ್ದು, ಆ ಪರ್ವದ ಮೇಲೆ ಯಾವುದೇ ಅಶುಭ ಚಿಹ್ನೆಗಳು ಇಲ್ಲದಿದ್ದರೆ ಅಂತಹ ಹಸ್ತ ಹೊಂದಿರುವ ವ್ಯಕ್ತಿಗೆ ಪಂಚಮಹಾಪುರುಷ ಯೋಗಗಳಲ್ಲಿ ಒಂದಾದ ಹಂಸಯೋಗವಿದೆಯೆಂದು ಅರ್ಥೈಸಬೇಕು. ಹಂಸಯೋಗವಿರುವ ವ್ಯಕ್ತಿ ಸದಾ ನಗುಮೊಗದಿಂದ ಕೂಡಿರುತ್ತಾನೆ. ಉತ್ತಮ ಪದವಿ ಹೊಂದಿ ಉತ್ತಮ ಜೀವನ ನಡೆಸುತ್ತಾನೆ. ಪಂಚಮಹಾಪುರುಷ ಯೋಗಗಳಲ್ಲಿ ಮಾಳವ್ಯ ಯೋಗ ಎರಡನೆಯದು. ವ್ಯಕ್ತಿಯ ಹಸ್ತದಲ್ಲಿ ಹೆಬ್ಬೆರಳಿನ ಕೆಳಭಾಗದಲ್ಲಿ ಇರುವ ಪರ್ವವನ್ನು ಶುಕ್ರಪರ್ವ ಎನ್ನುತ್ತಾರೆ. ಗ್ರಹಗಳ ಕಾರಕತ್ವದಲ್ಲಿ ಮನುಷ್ಯ ಜೀವಿಗಳಿಗೆ ಶುಕ್ರಗ್ರಹವು ಸುಖವನ್ನು ಕೊಡುವ ಕಾರಣ ಶುಕ್ರನನ್ನು ಸುಖಕಾರಕ ಎನ್ನುತ್ತಾರೆ. ಆ ಕಾರಣ ಯಾರಲ್ಲಿ ಶುಕ್ರಪರ್ವವು ಬಲಾಢ್ಯವಾಗಿದ್ದು ಕೆಂಪು ಬಣ್ಣದಿಂದ ಕೂಡಿ ಯಾವುದೇ ಅಶುಭ ರೇಖೆಗಳೇ ಇಲ್ಲದೆ ಸ್ಪಷ್ಟವಾಗಿ ಕಾಣುತ್ತಿದ್ದರೆ ಹಾಗೆಯೇ ಈ ಪರ್ವದ ಮೇಲೆರ ಶುಭ ಚಿಹ್ನೆಗಳು ಕಂಡು ಬರುತ್ತಿದ್ದರೆ ಮಾಳವ್ಯ ಯೋಗದಲ್ಲಿ ವ್ಯಕ್ತಿ ಜನಿಸಿದ್ದಾನೆ ಎನ್ನಬಹುದು. ಈ ಯೋಗ ಹೊಂದಿರುವ ವ್ಯಕ್ತಿ ಉತ್ತಮವಾದ ಸುಖವನ್ನು ಪಡೆಯುತ್ತಾನೆ. ರುಚಿಕ ಯೋಗವು ಜಾತಕ ಅಥವಾ ಹಸ್ತದಲ್ಲಿ ಮಂಗಳನಿಂದ ರೂಪಿತವಾಗುತ್ತದೆ. ಯಾರ ಹಸ್ತದಲ್ಲಿ ಕುಜಗ್ರಹದ ಸಕಾರಾತ್ಮಕ ಪರ್ವವು ಉತ್ತಮವಾಗಿದೆಯೋ ಅವರಿಗೆ ರುಚಿಕ ಯೋಗವಿದೆಂದು ತಿಳಿಯಬಹುದು. ಈ ಪರ್ವದ ಜೊತೆ ಯಾರ ಹಸ್ತದಲ್ಲಿ ಗದಾಚಿಹ್ನೆ, ಖಡ್ಗ ಚಿಹ್ನೆ ಕಂಡು ಬಂದಲ್ಲಿ ಉತ್ತಮ ಫಲ ದೊರೆಯುತ್ತದೆ. ಯಾರ ಹಸ್ತದಲ್ಲಿ ಶನಿ ಪರ್ವವು ಉತ್ತಮವಾಗಿ ಬೆಳೆದಿದ್ದು ಶನಿ ಬೆರಳು, ರವಿ ಬೆರಳಿಗಿಂತ ಉದ್ದವಾಗಿದ್ದರೆ ಅವರು ಶಶಯೋಗದವರು. ಈ ಯೋಗದವರು ಗಣ್ಯಾತಿಗಣ್ಯರಾಗಿರುತ್ತಾರೆ. ಭದ್ರಯೋಗ ಪಂಚಮಹಾಯೋಗಗಳಲ್ಲಿ ಕೊನೆಯದು. ಯಾರ ಹಸ್ತದಲ್ಲಿ ಬುಧಪರ್ವವು ಉತ್ತಮವಾಗಿದ್ದು ಬುಧಪರ್ವದ ಮೇಲೆ ಶುಭ ಚಿಹ್ನೆಗಳಿದ್ದರೆ ಅವರು ಪ್ರಖ್ಯಾತ ಪಂಡಿತರಾಗುತ್ತಾರೆ.